HM í pílu hefst í dag: Öld Luke-anna runnin upp

Littler var senuþjófur heimsmeistaramótsins 2024 en þessi sextán ára kjarnorkukrakki frá Warrington vann hvern andstæðinginn á fætur öðrum þar til Humphries stöðvaði hann loks í úrslitunum.

Littler hefur nýtt sér meðbyrinn og unnið hvert mótið á eftir öðru á þessu ári. Alls hefur hann unnið tíu mót en aðeins þrír menn hafa afrekað það á einu ári. Og það engir smákallar: Michael van Gerwen, Phil Taylor og Peter Wright.

Titlar sem Luke Littler hefur unnið á árinu

Það er líka svo að veðbankar telja Littler líklegastan til að vinna HM og lyfta Sid Waddell bikarnum 3. janúar næstkomandi. En Humphries ætlar ekki að gefa titilinn svo glatt eftir enda hefur hann líka átt stórgott ár. Hann mætir til leiks í kvöld en hann etur kappi við sigurvegarann í leik Thibaults Tricole og Joes Comito.

„Þeir tveir, Luke Littler og Humphries, hafa raðað inn titlum á þessu ári. Það eru margir sem spá því að Littler eigi möguleika á heimsmeistaratitlinum en það eru aðeins fleiri sem spá því að Humphries vinni aftur. Svo eru menn sem eru að sýna tennurnar aftur, eins og van Gerwen og Wright. Og Gary Anderson líka. Hann hefur spilað frábærlega á þessu ári,“ sagði Helgi Pjetur Jóhannsson sem mun ásamt öðrum lýsa heimsmeistaramótinu á Vodafone Sport.

Humphries hefur fylgt heimsmeistaratitlinum vel eftir sem er ekki sjálfgefið. Margir hafa unnið titilinn og ekki tekist að fylgja því eftir.

„Hann er eiginlega fyrsti leikmaðurinn síðan Phil Taylor sem á svona rosalega gott ár eftir að hafa unnið heimsmeistaratitilinn. Það er svo algengt að menn vinni titilinn og fylgi því ekki eftir. Það er mikil pressa sem fylgir, bæði utanaðkomandi og líka sem þeir setja á sjálfa sig. Við sáum það með Michael Smith sem datt heldur betur niður eftir að hafa orðið heimsmeistari,“ sagði Helgi.

„Það er ótrúlegt að sjá hversu traustur og stöðugur Humphries er. Kannski græðir hann á því hversu mikla athygli Littler fær. Augun beinast kannski ekki jafn mikið að honum og ef Littler hefði ekki komið til sögunnar.“

Tíu efstu menn heimslistans

Helgi segir að við munum líklega sjá keppni milli Luke-anna um stóru titlana næstu árin. Littler er aðeins sautján ára og Humphries 29 ára sem þykir ekki hár aldur í pílukastinu.

„Ekki spurning. Ég held að flestir spái því að miðað við það sem Littler hefur sýnt okkur, að komast í úrslit í fyrra, vinna alla þessa stóru titla og sigra Humphries í úrslitum úrvalsdeildarinnar og fleiri úrslitaleikjum, að þetta verði keppni milli þeirra áfram,“ sagði Helgi sem segir að hugarfar Humphries komi honum langt. Þá hugsi hann betur um sig en margir keppendur fyrri ára.

„Hann ber rosalega mikla virðingu fyrir öllum og er góð fyrirmynd fyrir píluna. Og þessi kynslóð hugar betur að sjálfum sér, andlega og líkamlega. Áfengisdrykkja hefur verið samofin pílukastinu en margir af þessum bestu kösturum núna eru lausir við það. Þeir eru miklu meiri íþróttamenn en áður. Pílukast snýst líka mikið um andlega hlutann. Þú þarft að vera fáránlega sterkur á taugum í hápressuleikjum.“

Heimsmeistarar síðustu tíu ára

Alltaf eru einhverjir keppendur sem koma á óvart og blanda sér í baráttuna um heimsmeistaratitilinn, eins og Littler gerði í fyrra.

„Ég er mjög spenntur fyrir Mike De Decker. Þetta er Belgi sem hefur komið sterkur inn og vann stóran titil nýlega,“ sagði Helgi og vísaði til sigurs De Deckers á World Grand Prix þar sem hann sigraði Humphries í úrslitum.

„Hann þarf ekki að spila í 1. umferð og er í þokkalega þægilegum hluta mótsins. Hann er í sama hluta og Humphries og gæti mætt honum. Hann gæti komið á óvart og komist langt. Menn tala líka um Peter Wright, að hann sé útbrunninn en hann gæti komið á óvart. Hann hefur stigið mikið upp að undanförnu og ég held að hann eigi fullt inni. Hver veit nema hann taki þriðja titilinn sinn?“

Helgi var einnig beðinn um að nefna nokkuð óþekkta keppendur til að fylgjast með á HM.

„Það er alltaf gaman að fylgjast með Japönum eins og Tomoya Goto. Hann sýndi rosalega skemmtilega hluti í fyrra og það verður fróðlegt að sjá hvort hann nái langt,“ sagði Helgi. 

„Líka Wesley Plaisier frá Hollandi. Hann er Luke Humphries-megin í drættinum. Hann hefur gert góða hluti hjá WDF samtökunum en færði sig svo yfir til PDC. Hann getur í raun unnið alla og er rosalega góður skorari,“ sagði Helgi Pjetur að lokum.

Bein útsending frá fyrsta degi heimsmeistaramótsins í pílukasti hefst klukkan 18:55 á Vodafone Sport í kvöld. Sýnt verður beint frá öllum keppnisdögum mótsins á Vodafone Sport.

Fyrsti keppnisdagur HM