Erlent

Sam­staða í Fær­eyjum um að bjóða út Suðureyjargöng

Kristján Már Unnarsson skrifar
Frá blaðamannafundi á Þinganesi í Þórshöfn í dag þar sem fulltrúar allra flokka á Lögþingi Færeyja undirrituðu samkomulag um Suðureyjargöng.
Frá blaðamannafundi á Þinganesi í Þórshöfn í dag þar sem fulltrúar allra flokka á Lögþingi Færeyja undirrituðu samkomulag um Suðureyjargöng. LØGMANSSKRIVSTOVAN

Fulltrúar allra flokka á Lögþingi Færeyja undirrituðu í dag sameiginlegan sáttmála um Suðureyjargöng með tilheyrandi vegtengingum. Samtímis var kynnt lagafrumvarp, sem allir flokkarnir sex standa á bak við, um stofnun sérstaks félags, P/F Suðuroyartunnilin, um gerð og rekstur ganganna. Þar er gert ráð fyrir ríflegum stofnframlögum úr landssjóði Færeyja upp á samtals fjóra milljarða íslenskra króna næstu tvö ár.

Jarðgangafélaginu verður heimilt að standa fyrir öllum nauðsynlegum rannsóknum, undirbúa útboð og að bjóða út verkið, samkvæmt frumvarpinu. Hins vegar verður félaginu ekki heimilt að ganga að neinu tilboði án samþykkis Lögþingsins og þegar nákvæm kostnaðaráætlun liggur fyrir.

Stöð 2 heimsótti Færeyjar síðastliðið sumar og fjallaði þá um Suðureyjargöng í frétt sem sjá má hér:

Suðureyjargöng verða þau langlengstu í Færeyjum. Samkvæmt þeirri veglínu, sem frumvarpið miðar við, verða þau 22,8 kílómetra löng og 9,5 metra breið með mögulegri tengingu við Skúfey. Veghalli verður mestur fimm prósent og mesta dýpi 180 metrar.

„Víðtæk pólitísk samstaða er meðal flokka á þingi um að núna sé kominn tími til að taka ákvörðun. Suðurey er eina stóra eyjan sem eftir er, sem hefur ekki fasta tengingu, og auk þess eru samgöngur þangað ótryggar,“ segir meðal annars í samkomulaginu.

Suðureyjargöng verða neðansjávargöng milli Sandeyjar og Suðureyjar með mögulegum legg til Skúfeyjar.LØGMANSSKRIVSTOVAN

„Stjórnmálaflokkarnir eru sammála um að Suðureyjagöng séu nauðsynleg framkvæmd ef snúa eigi við byggðaþróun á Suðurey og telja einnig að fjárfestingin muni með tímanum hafa jákvæð áhrif á fjárlögin þar sem kostnaður við ferjusiglingar muni sparast,“ segir ennfremur.

Aksel V. Johannesen, lögmaður Færeyja, sló þó varnagla á blaðamannafundi í Þórshöfn í dag. Enn væri mikil óvissa um jarðgangaverkefnið. Vinnu við ítarlegt áhættumat á verkinu væri ólokið. Og þótt áætla mætti að göngin gætu kostað í kringum áttatíu milljarða íslenskra króna vissi enginn nákvæmlega hvað þetta risastóra samgönguverkefni myndi í raun kosta.

Hér má heyra hvernig Hvalfjarðargöngin reyndust Færeyingum innblástur í jarðgangagerð:

Færeyjar Samgöngur Danmörk Byggðamál Vegagerð Jarðgöng á Íslandi Vegtollar

Tengdar fréttir

Búa sig undir ákvörðun um stærsta mannvirki Færeyja

Færeyingar búa sig núna undir stærstu ákvörðun færeyskrar mannvirkjagerðar, hvort grafa eigi 26 kílómetra löng neðansjávargöng til Suðureyjar. Þeir stefna að ákvörðun eftir hálft ár og vonast til að framkvæmdir hefjist innan þriggja ára.

Segir samstöðu lykilinn að jarðgangagerð Færeyinga

Algjör samstaða um jarðgangagerð er lykillinn að samgöngubyltingu Færeyja, segir ráðherrann Høgni Hoydal, og segir Hvalfjarðargöngin hafa reynst Færeyingum innblástur. Og það eru ekki Danir sem borga.

Færeyingar byrjuðu á enn einum jarðgöngum í dag

Færeyingar hófu í dag að grafa enn ein jarðgöngin, að þessu sinni tveggja kílómetra innanbæjargöng í jaðri Þórshafnar. Þetta þýðir að samtímis er núna verið að grafa sex jarðgöng í Færeyjum, til viðbótar við tvenn sem frændur okkar hafa nýlokið við.

Jarðgöngin koma í röðum, þau næstu fyrir áttatíu íbúa

Ekkert lát ætlar að verða á jarðgangaborunum Færeyinga. Fyrir tveimur vikum fögnuðu þeir fyrstu sprengingu nýrra Árnafjarðarganga. Samtímis er hafið útboðsferli á göngum til Fámjins, áttatíu manna byggðar á Suðurey.

Segir Færeyjar verða stærri með göngum

Færeyingar hafa verið sex sinnum afkastameiri en Íslendingar í jarðgangagerð, - ein göngin grófu þeir fyrir fimmtán íbúa, - og nú áforma þeir fimm ný jarðgöng. Fjármálaráðherrann þeirra segir að ef bara ætti að hugsa um hagkvæmni væri best að hafa alla Færeyinga í einni blokk. Öflugt þjóðvegavegakerfi er með því fyrsta sem Íslendingur á ferð um Færeyjar tekur eftir. Hver einasti kílómetri er malbikaður. Engir malarvegir.

Mest lesið


Fleiri fréttir

Sjá meira


×

Mest lesið