ÍBV með stór­sigur gegn ÍR meðan KA og Stjarnan skildu jöfn

ÍR - ÍBV 31-41

Sigurinn var aldrei í hættu hjá gestunum sem settu tóninn strax í upphafi og skoruðu fyrstu þrjú mörk leiksins. Heimamenn ÍR komust aldrei nálægt þeim.

Daniel Esteves Vieira varð markahæstur með níu mörk úr tíu skotum. Sigtryggur Daði Rúnarsson fylgdi þar eftir með sex mörk úr níu skotum. Fjórir leikmenn skoruðu fjögur mörk en alls komust ellefu leikmenn á blað hjá ÍBV.

Pavel Miskevich átti fínan leik í markinu, varði tíu skot auk þess að gefa tvær stoðsendingar.

Hjá ÍR dró Baldur Fritz Bjarnason vagninn, langmarkahæstur með ellefu mörk og gaf fimm stoðsendingar að auki.

ÍBV hefur nú safnað ellefu stigum úr níu leikjum og situr í þriðja sæti deildarinnar. ÍR er í næstneðsta sæti með fimm stig. Jafnt KA að stigum.

KA - Stjarnan 27-27

KA tók á móti Stjörnunni og gerði 27-27 jafntefli eftir æsispennandi leik.

Frá upphafsflauti munaði aldrei meira en tveimur mörkum milli liðanna. Stjarnan leiddi og KA elti fyrst um sinn, en það snerist í seinni hálfleik.

KA tók tveggja marka forystu þegar tæpar tíu mínútur voru eftir og leiddi leikinn á lokasprettinum.

Stjarnan minnkaði muninn í eitt mark þegar minna en mínúta var eftir. KA tók leikhlé fyrir síðustu sóknina en missti boltann og Stjarnan jafnaði.

Bjarni Ófeigur reyndi að skora sigurmarkið með skoti fyrir aftan miðju en klikkaði og liðin skiptu stigunum jafnt milli sín.

KA er því áfram í neðsta sæti deildarinnar. Stjarnan er í 8. sæti, jöfn Haukum með 8 stig.