Ó­venju­leg aukin virkni við Geysi

Þetta kemur fram í tilkynningu á Facebook síðu Veðurstofunnar, þar sem segir að fulltrúi frá Umhverfisstofnun á vettvangi hafi staðfest að margir hverir á svæðinu hafi tekið við sér og væru nú mun kröftugri en fyrr. 

Grjót og hverahrúður þeyst með

Fram kemur að sérstök athygli hafi verið á Strokki, sem hafi verið óvenju virkur undanfarna daga og gosið hærri og kröftugri, jafnvel svo að grjót og hverahrúður hafi þeyst með gosunum. Hverinn gjósi nú oftar en áður, með strókum sem ná allt að þrjátíu metra hæð. Engar breytingar hafi þó orðið á Geysi sjálfum.

Þá segir að sérfræðingar Umhverfisstofnunar, Veðurstofunnar og Almannavarna hafi farið yfir stöðuna á fundi nú síðdegis. Áfram verði fylgst með stöðunni og sé unnið að því að greina orsök þessarar auknu virkni. 

Loks segir að jarðhitasvæði séu mjög breytileg og er alltaf einhver hætta til staðar í nágrenni þeirra vegna sjóðandi vatns og gufu. Veðurstofan biðlar til ferðamanna á Geysissvæðinu að fara varlega og halda sig í öruggri fjarlægð frá hverunum og fylgja fyrirmælum Umhverfisstofnunar sem hefur umsjón á svæðinu.

Í myndbandi við færslu Veðurstofunnar má sjá virknina á svæðinu í dag.