Erlent

Harris situr fyrir svörum hjá Fox News á morgun

Hólmfríður Gísladóttir skrifar
Harris er á ferð og flugi þessa dagana og hefur mætt í viðtöl á hinum og þessum miðlum til að ná til sem flestra kjósenda.
Harris er á ferð og flugi þessa dagana og hefur mætt í viðtöl á hinum og þessum miðlum til að ná til sem flestra kjósenda. AP/Jacquelyn Martin

Kamala Harris, varaforseti Bandaríkjanna og forsetaefni Demókrata, hefur samþykkt að veita Fox News viðtal, sem tekið verður á morgun og sýnt um kvöldið.

Fox News hefur almennt farið mjúkum höndum um Donald Trump, fyrrverandi Bandaríkjaforseta og forsetaefni Repúblikana, og verið afar gagnrýnið á Demókrataflokkinn. Þannig má Harris gera ráð fyrir erfiðum spurningum en á sama tíma er um að ræða tækifæri til að ná til stærri hóps kjósenda.

Samkvæmt umfjöllun erlendra miðla má gera ráð fyrir að viðtalið verði um 30 mínútur að lengd.

Varaforsetaefni Harris, Tim Walz, hefur þegar verið gestur Fox, tvær síðustu helgar, og þá hafa þáttastjórnendur Fox einnig fengið til sín aðra Demókrata, til að mynda ríkisstjórana Gavin Newsom og Josh Shapiro.

Trump, sem hefur neitað að mæta Harris í öðrum kappræðum, mun einnig bregða fyrir á Fox á morgun, þar sem hann mun svara spurningum frá áhorfendum úr sal, sem allir verða konur.

Bandaríkin Forsetakosningar í Bandaríkjunum 2024 Kamala Harris

Mest lesið


Fleiri fréttir

Sjá meira


×

Mest lesið