Sviptum greiðslu­miðlun RA­PYD starfs­leyfi

Þegar ég stofnaði fyrsta kreditkortafyrirtækið á Íslandi sem ungur maður, óraði mig aldrei fyrir að greiðslumiðlunin sem ég setti á fót myndi áratugum síðar tengjast ofbeldi og hryðjuverkum í mið austurlöndum.

Fyrir Alþingi liggur þingsályktunartillaga um að setja viðskiptabann á Ísrael. Flutningsmaður tillögunnar talar um að viðskipti Íslands og Ísraels séu óveruleg en hefur líklegast yfirsést að frá Íslandi er rekið alþjóðlegt fjármálafyrirtæki í eigu herskárra Ísraelsmanna með nær 26 milljarðar tekjum.

Fjártæknifyrirtækið Rapyd notar hið góða nafn Íslands á erlendum vettvangi til að greiða fyrir og auka viðskiptaveldi sitt. Eigendurnir hafa látið ljósmynda sig í svuntum merktum RAPYD með hríðskotariffla og lýst yfir stuðningi á opinberum vettvangi við þjóðarmorðið á Gaza. Myndirnar má sjá hér: https://austurvollur.is/blog/rapyd/

Hryðjuverkastjórnin í Ísrael

Ísrael voru fyrstir til að beita hryðjuverkum þegar þeir byrjuðu með ofbeldi að knýja á um stofnun Ísraels ríkis í Palestínu á síðustu öld. Ísrael braut síðan aftur blað í síðasta mánuði þegar þeir notuðu sprengjur í fjarskiptatækjum og limlestu og drápu þúsundir manns í Lebanon. Sérfræðingar telja hættu á því að þessi hryðjuverka aðferð verði einnig tekin upp af öðrum.

Landrán með morðum og ofbeldi

Ríkisstjórn Ísrael og hersveitir þeirra hafa í áratugi veitt landtökumönnum stuðning við að sölsa undir sig land og heimili palestínumanna með vopnum og ofbeldi. Þetta hefur verið gert með svo afdrífaríkum hætti að svokölluð tveggja ríkja lausn er er ekki lengur raunhæfur möguleiki eftir að ólögmætar landnemabyggðir hafa sprottið upp eins og gorkúlur um alla Palestínu síðustu áratugi. Sérfræðingar eru á því að ef reynt verður að fá landnemana, sem flestir eru vopnaðir, til að yfirgefa landnemabyggðirnar muni það leiða til borgarastyrjaldar í Ísrael.

Tveggja ríkja lausn þarf að hugsa uppá nýtt

Það þarf að hugsa tveggja ríkja lausn upp á nýtt, t.d. út frá átakinu www.alandforall.org þar sem íbúar Ísrael og Palestínu verða með sitthvort ríkisfangið en búseturétt allstaðar í báðum löndunum. Ekki ósvipað og Evrópusambandið er í dag.

Búið að drepa tugi þúsunda á einu ári

Á Gaza er búið að drepa nær 42,000 manns, nær 17 þúsund börn. Slasaðir eru nær 100 þúsund og talið er að 10,000 manns séu grafin undir rústum bygginga. Með sprengjuárásum Ísrael er búið að eyðileggja meira en helmingin af heimilum á Gaza, 80% af atvinnuhúsnæði, 87% af skólum, 17 af 36 sjúkrahúsum eru aðeins að hluta til starfandi, 68% af vegakerfi er ónýtt og 68% af ræktunarlandi. Gaza hefur verið gert nánast óbyggilegt.

Aðgerðir Ísraels hafa lítið með sjálfsvörn að gera. Það er hverjum manni ljóst sem kynnir sér hvað er í gangi þarna með óhlutdrægum hætti að aðgerðir Ísraelsstjórnar snúast um að sölsa undir sig alla Palestínu og útrýma palestínsku þjóðinni eða reka hana á flótta úr heimalandi sínu.

Þetta má lesa úr yfirlýsingum ráðamanna í fjölmiðlum og samfélagsmiðlum. Enn frekar undirstrikað með landakorti sem Netanyahu forsætisráðherra Ísrael kynnti sem hið nýja Ísrael fyrr á þessu ári á allsherjarþingi Sameinuðu þjóðanna.

Leiðtogar Ísrael fyrir stríðsglæpadómstólinn

Saksóknari Stríðsglæpadómstólsins í Haag hefur óskað eftir handtökuskipun á hendur forráðamönnum Ísraels fyrir stríðsglæpi. Í raun erum við að sjá spegilmynd af ofsóknum Hitlers gegn gyðingum á síðustu öld, nú ber skrímslið sem við erum að fást við nafnið Netanyahu.

Hernaður Ísraela kyndir undir gyðingahatur

Málsmetandi gyðingar um allan heim horfa með hryllingi uppá hvað er að gerast. Ekki aðeins er verið að útrýma palestínsku þjóðinni í beinum útsendingum sem við horfum upp á hverjum degi, aðgerðir Ísraels eru einnig að grafa undan öryggi Ísraels til frambúðar og auka verulega hættu á því að allsherjarstyrjöld brjótist út í mið austurlöndum sem gæti ógnað allri heimsbyggðinni bæði efnahagslega og hernaðarlega. Aðgerðirnar eru einnig að auka andúð á gyðingum um allan heim. Þeir sem eru gyðingum verstir í dag er ríkisstjórn Ísrael og þeirra hryðjuverkastarfsemi.

Þaggað niður í friðarumleitunum með morðum

Hamas og Hizbolla samtökin hafa bæði lýst því yfir að um leið og Ísrael hætti árásum á Gaza og láti af hernaði gegn nágrönnum sínum, muni þeir leggja niður vopn. Ríkisstjórn Ísraels hefur hafnað öllum slíkum tillögum um vopnahlé og frið og í raun gert út á að myrða þá leiðtoga sem hafa talað fyrir friði. Friður mun ekki komast á með slíku ofbeldi í mið austurlöndum.

Nauðsynlegt að einangra Ísrael með viðskiptabanni

Öflugustu aðgerðir til að knýja á Ísrael að láta af þessu hátterni og leita friðsamlegra lausna með nágrönnum sínum er að fjarlæg lönd eins og Ísland einangri Ísrael á alþjóðavettvangi. Stuðli að því að lokað verði fyrir öll viðskipti við Ísrael.

Lög gegn peningaþvætti og fjármögnun hryðjuverka

Á Íslandi eru lög gegn peningaþvætti. Ísland hefur einnig bannað peningasendingar t.d. til Rússlands vegna innrásar Rússlands í Úkraínu. Íslensk stjórnvöld hljóta einnig að stöðva fjármagnssendingar til aðila í mið-austurlöndum sem styðja hryðjuverk og þjóðarmorð.

Starfsemi Rapyd er milljarða króna alþjóðleg fjármálaþjónusta. Þar eru hæg heimatök að stunda peningaþvætti til að styðja hryðjuverkastarfsemi og þjóðernishreinsanir í Palestínu og nærliggjandi löndum. Ísland þarf að taka fyrir þetta, t.d. með því að svifta Rapyd starfsleyfi.

Höfnum ofbeldi

Ísland á ótvírætt að setja viðskiptabann á Ísrael og beita sér fyrir því að önnur ríki geri það einnig. Þá er rétt að stöðva starfsemi alþjóðlegs fjármálafyrirtækis, Rapyd, sem hugsanlega notar fjármálakerfi landsins til að kynda undir ofbeldi í ólögmætum landnemabyggðum.

Höfundur var stofnandi Kreditkort hf og síðar Friðar 2000.