Tæp­lega þrjú þúsund slasaðir eftir að sím­boðar sprungu

Ríkisfjölmiðill Líbanons segja sprengingarnar margar hafa orðið í úthverfum í suðurhluta höfuðborgarinnar Beirút en fregnir hafa einnig borist af særðum Hezbollah-liðum í Sýrlandi.

Heimildarmaður Wall Street Journal úr Hezbollah segir að símboðarnir hafi tilheyrt nýrri sendingu sem samtökunum barst á dögunu. Hundruð vígamanna eru sagðir hafa fengið símboða úr sendingunni. Leiðtogar Hezbollah kenna Ísrael um sprengingarnar og heita hefndum.

Heilbrigðisráðherra Líbanon sagði í dag að rúmlega 2.800 væru særðir og minnst átta væru látnir. Búist er við því að báðar tölur muni hækka. Reuters segir son þingmanns Hezbollah vera meðal hinna látnu.

Á myndböndum og myndum sem birtar hafa verið á samfélagsmiðlum má sjá særða menn sem verið er að flytja á sjúkrahús. Liðsmaður Hezbollah segir í samtali við Reuters að um sé að ræða „stærsta öryggisbrestinn til þessa“ frá því að átökin við Ísrael stigmögnuðust í kjölfar stríðsátakanna á Gasa.

Mikil óreiða ríkir á sjúkrahúsum í Líbanon. Hér að neðan má sjá myndband frá einu sjúkrahúsi en vert er að vara lesendur við því að það geti vakið óhug.

Í frétt BBC segir að talsmenn Ísraelshers hafi ekki ekki tjáð sig um málið. Ólíklegt er að Ísraelar muni lýsa yfir ábyrgð eða viðurkenna að hafa gert einhverskonar árás.

Sjá einnig: Herforingi kallar eftir innrás í Líbanon

Stjórnvöld í Ísrael hafa áður varað við að möguleiki sé á að ráðist verði í hernaðaraðferð til að láta liðsmenn Hezbollah hörfa frá svæðum næst ísraelsku landamærunum.

Spjótin beinast, eins og áður hefur komið fram, að yfirvöldum í Ísrael en óljóst er hvernig hægt væri að framvkæma árás sem þessa. Einhverjar fregnir hafa borist af því að fólk hafi fundið símboða sína hitna áður en þeir sprungu og einhverjum hafi tekist að kasta þeim frá sér áður.

Eðli málsins samkvæmt er margt enn mjög óljóst en sérfræðingar segja ólíklegt að sprengingar sem myndbönd í drefingu sýna, geti gerst án sprengiefnis. Það er að segja að líklega hafi smáum sprengjum verið komið fyrir í símboðunum.

Hér að neðan má sjá tvö myndbönd sem eiga að sýna símboða springa í Líbanon. Myndböndin geta vakið óhug.

Hafa varað við notkun snjalltækja

Hassan Nasrallah, æðsti leiðtogi Hezbollah, hefur varað meðlimi samtakanna um að bera farsíma, því yfirvöld í Ísrael geti vaktað þá og fylgst með ferðum þeirra.

Sendiherra Írans í Líbanon er einn þeirra sem særðist í dag. Hezbollah hefur um árabil notið mikils stuðnings frá klerkastjórn landsins.

Í fyrstu yfirlýsingu leiðtoga Hezbollah segir að símboðarnir hafi sprungið klukkan 15: 30 að staðartíma. Minnst tveir meðlimir samtakanna hafi látið lífið, auk tíu ára stúlku. Þar segir að mikill fjöldi manna hafi særst.

Þá segir í yfirlýsingunni að málið sé til rannsóknar og eru meðlimir Hezbollah beðnir um að vera á varðbergi.

Fréttin var síðast uppfærð 15:30.