Ís­lendinga­liðin í bullandi fall­bar­áttu eftir töp dagsins

Arnór Ingvi Traustason var í byrjunarliði Norrköping sem mátti þola afhroð á heimavelli. Arnór Ingvi var tekinn af velli þegar stundarfjórðungur lifði leiks en skömmu áður hafði Varnamo skorað tvö mörk með stuttu millibili.

Lokatölur 0-4 og Norrköping ekki unnið leik síðan 28. apríl, síðan þá hefur liðið aðeins náð í eitt stig.

Kolbeinn Þórðarson lék allan leikinn þegar Gautaborg tapaði 5-2 á útivelli gegn AIK. Tvö markanna komu í uppbótartíma en staðan var jöfn 2-2 þegar tuttugu mínútur lifðu leiks. Markvörðurinn Adam Ingi Benediktsson sat allan tímann á varamannabekk Gautaborgar.

Bæði lið eru með 11 stig að loknum 11 umferðum, Norrköping er sem stendur í umspilssæti að halda sæti sínu í deildinni og aðeins stigi fyrir ofan Kalmar sem er í fallsæti. Gautaborg heldur sér fyrir ofan umspilssætið á markatölu einni.