For­sætis­ráð­herra veislu­stjóri í fimm­tugs­af­mæli aldarinnar

Atli Steinn hefur um árabil verið búsettur í Noregi þaðan sem hann skrifar greinar af öllum toga í Morgunblaðið. Hann hefur vakið athygli fyrir lipra textasmíð og orðheppni. 

Vinir hans á Facebook eiga auk þess sjaldan dauða stund enda Atli Steinn í frásagnargír innan sem utan vinnu og frá mörgu að segja.

Guðbjörn Guðbjörnsson óperusöngvari var á meðal gesta í veislunni í gærkvöldi og var ekki að skafa af því í færslu á Facebook í dag. 

Hann segir Atla Stein í hópi tíu skemmtilegustu, gáfuðustu og merkustu manna sem hann hefur hitt á lífsleiðinni.

„Atli Steinn opnaði með drepfyndnu uppistandi, salurinn hreinlega veltist um af hlátri. Ég hugsaði með mér að ekki myndi ég vilja halda ræðu í kjölfarið á þessari fullkomlega heppnuðu opnun,“ segir Guðbjörn.

Hann vissi ekki hvaðan á hann stóð veðrið þegar veislustjórinn birtist.

„Veislustjórinn var þá kynntur til leiks og það reyndist vera engin önnur en Katrín Jakobsdóttir forsætisráðherra landsins. Þau stunduðu íslenskunám saman. Katrín hélt eitthvað það flottasta og fyndnasta 'laudatio' sem ég hef nokkru sinni heyrt við slíkt tækifæri,“ segir Guðbjörn.

Gísli Jökull Gíslason náði upptöku af Katrínu flytja lofgjörð um afmælisbarnið sem sjá má að neðan.

„Eftir að hafa hlustað á Katrínu í gær hugsaði ég með mér að einmitt þarna værum við með allra, allra besta efnið í forseta landsins. Katrín var í ræðu sinni í senn einlæg og heiðarleg en að auki bráðfyndin og sýndi hversu gott vald hún hefur á íslenskri tungu. Aðdáunarvert. Ég hvet Katrínu Jakobsdóttur því til að fara í framboð til forseta Íslands. Af öllum öðrum sem nefndir hafa verið til sögunnar, ber hún hreinlega höfuð og herðar yfir það allt saman.“

Já, greinilegt að Guðbirni líst vel á Katrínu en hún var ekki eina úr hópi frægri gesta. Ólafur Ragnar Grímsson forseti leit við og náðist mynd af afmælisbarninu, kærustunni Anitu Sjøstrøm Libell Andersen, Guðbirni og Ólafi Ragnari.

Meðal annarra gesta var Martin Eyjólfsson sendiherra, Atli Bergmann veiðimaður, Kamilla Einarsdóttir rithöfundur, Örn Úlfar Sævarsson auglýsingagúrú, Frosti Logason fjölmiðlamaður, Marta María Winkel ásamt manni sínum Páli og auðvitað fjöldinn allur af ritstjórn Morgunblaðsins. Náðist flott hópmynd af blaðamönnum miðilsins og helst að ritstjóranna Davíðs og Haraldar væri saknað á myndinni. Aðrir voru mættir og í banastuði. Lengi mætti telja upp gesti enda Atli Steinn komið víða vel á náms- og starfsferli sínum.

Erpur Eyvindarson söng svo um að allir væru að fá sér og fleiri smelli með XXX Rottweilerhundum. Sem sagt, stuð og stemmning.