Sverrir Ingi: Heppnin með okkur og við ætlum á Evrópumótið

Eran Zahavi braut ísinn fyrir Ísrael þegar hann kom liðinu yfir með marki úr vítaspyrnu eftir tæplega hálftíma leik. Daníel Leó Grétarsson hafði þá brotið af sér innan vítateigs. 

„Ég held að þegar við horfum til baka hafi bara verið fínt að við lentum undir. Við eiginlega vöknuðum við það, vorum full passívir í byrjun fannst mér, mikið undir og spennustigið hátt. Þeir fengu vítaspyrnu upp úr eiginlega engu og þá byrjuðu menn svolítið að spila sinn leik. Mikið sem er hægt að taka með í leikinn á þriðjudag en fyrst og fremst bara geggjaður karakter í strákunum“ sagði Sverrir Ingi, landsliðsfyrirliði, strax að leik loknum. 

Raddlaus eftir leik

Íslensku strákarnir voru ekki lengi að svara og á 39. mínútu jafnaði Albert Guðmundsson metin fyrir Ísland með glæsilegu marki, beint úr aukaspyrnu.

Þrátt fyrir að blési á móti hélt Sverrir áfram að hvetja liðsfélaga sína áfram. Aðeins þremur mínútum síðar var staðan svo orðin 2-1 Íslandi í vil eftir að Arnór Ingvi Traustason kom boltanum í netið með föstu skoti sem fór af varnarmanni. Boltinn barst þá til hans úti í vítateig eftir að Sverrir Ingi hafði fleytt hornspyrnu Alberts Guðmundssonar áfram. 

„Ég er eiginlega bara raddlaus. Maður er að reyna að halda mönnum við efnið því oft þarf rosalega lítið til að menn slökkvi á sér. “

Heppnin með okkur í liði

Ísraelsmenn misstu mann af velli á 73. mínútu en fengu aðra vítaspyrnu og tækifæri til að jafna leikinn skömmu síðar. Eran Zahavi steig aftur á punktinn en skot hans geigaði. 

„Við vorum heppnir þarna í stöðunni 2-1 þegar það kemur önnur vítaspyrna en við vorum með heppnina með okkur í dag. Ýmis atriði sem við þurfum að laga fyrir leikinn á þriðjudaginn, sérstaklega í varnarleiknum en sóknarlega erum við bara með svo mikið af hæfileikum í þessum ungu strákum. Ég hafði fulla trú á því að við myndum skora mörk í dag.“

Allt púður fór úr ísraelska liðinu eftir það. Strákarnir okkar gengu á lagið og aðeins þremur mínútum eftir vítaspyrnuna skoraði Albert sitt annað mark eftir frábæran sprett upp hálfan völlinn. 

Albert bætti svo fjórða markinu við á 89. mínútu þegar boltinn datt fyrir hann í markteignum eftir skot Jóns Dags.

„[Albert] bara geggjaður. Hann er búinn að spila frábærlega á Ítalíu þessu tímabili, í einni bestu deild í heimi. Hann sýndi það í dag að hann er í formi og ég er bara ánægður fyrir hans hönd. Frábær leikur hjá honum og öllu liðinu. Nú er bara að safna orku fyrir þriðjudaginn – það verður allt undir þar.“

Ætlar sér á Evrópumótið

Þá er orðið ljóst að Ísland mætir Úkraínu í næsta leik – úrslitaleik um sæti á Evrópumótinu í sumar. Sverrir hefur fulla trú á íslenska liðinu. 

„Mér er eiginlega alveg sama hvaða liði við mætum. Við förum í þennan leik af fullum krafti, ætlum að vinna og fara á Evrópumótið. Gera allt sem við getum í þeim leik og ég hef fulla trú á því að við getum komið út sem sigurvegarar þar“ sagði Sverrir Ingi fullur sjálfstrausts að lokum. 

Leikur Úkraínu og Íslands verður sýndur í opinni dagskrá á Stöð 2 Sport þriðjudaginn 21. mars. Leikurinn hefst klukkan 19.45 en upphitun fyrir leikinn hefst klukkan 19.10.