Man Utd sendir Reguilon aftur til Tottenham

Reguilon gekk í raðir United á láni frá Tottenham í ágúst á síðasta ári eftir að bakverðirnir Luke Shaw og Tyrell Malacia meiddust. Félagið hefur nú nýtt sér klásúlu í lánssamningi leikmannsins og hann snýr því aftur í herbúðir Tottenham, en búist er við því að bæði Shaw og Malacia verði klárir í slaginn síðar í þessum mánuði.

Þessi 27 ára gamli bakvörður lék alls tólf leiki fyrir Manchester United á sínum stutta tíma hjá félaginu. Þar af var hann í byrjunarliðinu sjö sinnum, nú síðast í 3-0 tapi gegn Bournemouth á heimavelli.

Manhester United og Tottenham eru bæði í harðri baráttu um sæti í Meistaradeild Evrópu á næsta tímabili. Tottenham situr í fimmta sæti ensku úrvalsdeildarinnar með 39 stig eftir 20 leiki, aðeins einu stigi frá Meistaradeildarsæti og átta stigum meira en Manchester United.