Van Gerwen var illt í maganum í gær

Van Gerwen tapaði leiknum gegn Williams, 5-3. Hann ræddi ekki við fjölmiðla eftir viðureignina og var fljótur að yfirgefa Alexandra höllina í London þar sem HM fer fram.

Eftir leikinn greindu hollenskir fjölmiðlamenn frá því að Van Gerwen væri illt í maganum og hafi því verið fljótur að láta sig hverfa úr Ally Pally. Magaverkurinn ku hafa haft áhrif á frammistöðu hans í leiknum gegn Williams.

Van Gerwen þarf að bíða enn lengur eftir sínum fjórða heimsmeistaratitli. Hann varð síðast heimsmeistari 2019. Hollendingurinn komst í úrslit á HM í fyrra en tapaði þar fyrir Michael Smith, 7-3.

Williams mætir Luke Humphries í undanúrslitum HM í kvöld. Í hinni undanúrslitaviðureigninni eigast ungstirnið Luke Littler og heimsmeistarinn fyrrverandi Rob Cross við.