Kosningar í Pól­landi: Tví­sýnt hvernig fer

Eins og Vísir hefur greint frá er tví­sýnt um hvort að Lög og rétt­læti, stjórnar­flokkur Pól­lands, nái hreinum meiri­hluta í kosningunum. Flokkurinn hefur verið við völd undan­farin tvö kjör­tíma­bil, frá því árið 2015. Búist er við því að fimm flokkar muni ná inn á þing að þessu sinni.

29 milljónir pólskra ríkis­borgara hafa kjör­gengi. 460 þing­menn eru í neðri deild pólska þingsins og hundrað í efri deild. 31 þúsund kjör­staðir verða opnir í dag og verða út­göngu­spár gefnar út klukkan 21:00 í kvöld að pólskum tíma, eða klukkan 19:00 að ís­lenskum.

Sam­hliða kosningunum hafa fjögur mál verið lögð í þjóðar­at­kvæða­greiðslu af stjórnar­flokknum Lög og rétt­læti. Pólskir kjós­endur verða spurðir um af­stöðu sína til inn­flytj­enda, um skoðanir sínar á vegg við landa­mær landsins að Hvíta-Rúss­landi, hækkun eftir­launa­aldurs og sölu á ríkis­eignum.

Sam­steypu­stjórn í kortunum

Flokkarnir þrír sem væru skýrasti val­kosturinn við Lög og rétt­læti; Borgara­vett­vangur Donalds Tusk, fyrr­verandi for­seta leið­toga­ráðs Evrópu­sam­bandsins, Þriðja leið miðju­flokkanna og Sósíal­demó­kratar, mælast saman með meira fylgi en miðað við dreifingu at­kvæða stefnir í að þeir næðu ekki meiri­hluta á þingi.

Fast­lega er gert ráð fyrir að flokkar muni þurfa að mynda sam­steypu­stjórn að kosningunum loknum með smærri flokkum, að því er fram kemur í um­fjöllun Guar­dian um kosningarnar. Lög og rétt­læti mælist með á milli 31 til 36 prósenta fylgi en Borgara­vett­vangur hefur mælst með nokkrum prósentu­stigum minna.

Donald Tusk, for­maður Borgara­vett­vangsins, vill mynda ríkis­stjórn með Þriðju leið miðju­flokkanna og Sósíal­demó­krötum á meðan talið er að það stefni í að Lög og rétt­læti muni þurfa að reiða sig á stuðning flokka sem eru yst á hægri skala stjórn­málanna í Pól­landi.