Litblindir ósáttir við búningavalið

Luton Town lék í aðaltreyju sinni sem er appelsínugul og hvít en Tottenham Hotspur mætti til leiks í þriðja búningi sínum sem er grár að lit. 

Fjölmargar kvartanir bárust frá þeim sem horfðu á leikinn að búningarnir væru ekki nógu aðgreinanlegir en reglur deildarinnar kveða á um að auðvelt eigi að vera að greina búninga liða í sundur fyrir leikmenn liðanna, dómara og þá sem mæta á leikina eða horfa í gegnum útsendingar. 

Kathryn Albany-Ward, stofnandi stuðningshóps litblindra, segir að tölfræðin sýni að einn leikmaður í hverju fótboltaliði í karlaflokki glími við litblindu. Gæta verði að því að búningar séu vel aðgreinanlegir og það hafi ekki verið gert í þessu tilfelli.