Skorar á ríkis­stjórnina að takast á við hinn raun­veru­lega „brennu­varg“

Í pistlinum segist Vilhjálmur vera búinn að gefast upp á íslensku krónunni og segir margt benda til þess að örmyntin eigi stóran þátt í hinum miklu efnahagssveiflum sem einkenna efnahagsástandið á Íslandi.

Þorgerður steig í pontu og beindi spurningu sinni um íslensku krónuna, sem Þorgerður kallar „brennuvarg,“ til viðskiptaráðherra.

„Mig langar að spyrja hæstvirtan ráðherra hvort hún er tilbúin til að grípa þennan bolta sem meðal annars Vilhjálmur Birgisson kastaði á loft og til í þetta samtal og til í að meta stöðuna fyrir heimilin í landinu og fyrir okkar samfélag. Hvaða valkostir eru í boði aðrir heldur en íslenska krónan?“

Henti best að vera með sjálfstæða peningastefnu

Ekki stóð á svörum frá Lilju Alfreðsdóttur, viðskiptaráðherra, sem hefur undanfarna daga leitað skýringa á því hvers vegna styrking krónunnar hafi ekki skilað sér í lægra vöruverði í matvörubúðum og átt fundi með forsvarsmönnum stóru matvörukeðjanna á Íslandi. Hún sagði verðbólguna vera stóra áskorun og að hún hefði viljað sjá hana hjaðna hraðar. Hún vísaði í úttekt Seðlabankans á gjaldmiðlamálum þegar hún svaraði Þorgerði.

„Seðlabankinn var mjög afgerandi í niðurstöðu sinni um að eins og staðan væri í dag að þá hentaði sjálfstæð peningastefna okkur og hefði skilað okkur umfangsmiklum ávinningi. Ef við ætluðum síðan að fara að skoða hvernig framtíðarskipulag peningastefnu á Íslandi eigi að vera þá tel ég að við verðum alltaf að skoða hagsveiflur viðkomandi ríkis og þá gjaldmiðilinn út frá því vegna þess að það sem hefur gerst á Íslandi er að hér hefur hagvöxtur verið til að mynda mun meiri en í löndum Evrópusambandsins og þá hentar sá gjaldmiðill að mínu mati alls ekki íslensku hagkerfi,“ sagði Lilja.

Vill efla „brunavarnirnar“ áður en kviknar í

Þorgerður rakti hagstjórnarákvarðanir Seðlabankastjóra þegar hún steig í pontu að nýju.

„Sami seðlabankastjóri ráðlagði heimilum landsins fyrir nokkrum misserum, örfáum mánuðum síðan þetta: „Um að gera, takið þið óverðtryggð lán.“ Formaður Sjálfstæðisflokksins fór í kosningabaráttu um að Ísland væri lágvaxtaland, halelújah! Hvað gerist síðan? Í dag er seðlabankastjóri að mæla eindregið með því fyrir íslensku heimilin í landinu, með öllum þeim byrðum, að fara inn í verðtryggð lán.“

Þorgerði Katrínu þykir tími til kominn að hugsa efnahagsmálin til lengri tíma.

„Af hverju getum við ekki reynt að fara að tala um kjarna málsins? Af hverju tölum við alltaf um brunavarnir þegar eldurinn er löngu kviknaður? Af hverju getum við ekki byrjað á grunninum og eflt okkar brunavarnir, ekki bara til skemmri tíma heldur til lengri tíma og um það snýst málið og það er það sem meðal annars forystufólk innan verkalýðshreyfingarinnar á við vegna þess að það er að tala við fólkið á gólfinu; við fólkið sem er að greiða þessi lán sem hafa farið úr 200 þúsund í 400 þúsund og úr 300 í 500 þúsund, fólkið sem getur ekki lengur borið þessar krónubyrðar sem eru alltaf settar reglulega á þeirra herðar,“ segir Þorgerður Katrín á Alþingi í dag.