Skilur ekkert í yfir­­­lýsingum um að­hald í ríkis­fjár­málum

„Þarna var verið að kynna tillögur sem við sáum í vor í tengslum við fjármálaáætlun. Þarna var verið að kynna tillögur sem við sáum þegar fjármálaráðherra lagði fram frumvarp sitt í fyrra. Það skiptir máli að ríkisstjórnin fari í það núna að sýna forystu, sýna á spilin um stefnu, að það séu aðgerðir sem eru í samræmi við markmið. Ég hef áhyggjur af því að ef þær aðgerðir sem ekki reyndust nægilegar í sumar og í fyrra eru nú aftur lagðar á borð þá verði niðurstaðan sú sama,“ segir Þorbjörg Sigríður Gunnlaugsdóttir innt eftir viðbrögðum um fjárlagafrumvarpið.

„Auðvitað er þetta sagt með þeim fyrirvara að við fengum bara grófa kynningu á frumvarpinu sjálfu og maður á eftir að rýna tölurnar og gögnin betur en í stóra samhenginu eru tölurnar óbreyttar.“

Hún óttast að frumvarpið skili ekki tilætluðum árangri.

„Ég hef vissar áhyggjur af því að þarna hafi ríkisstjórnin komið sér saman um einhverjar tillögur sem þessir þrír ofboðslega ólíku flokkar gátu sammælst um og fyrir vikið verði þetta eitthvað moð sem skili ekki árangri. Ég held að allir séu sammála um það á Alþingi að það eigi að standa vörð um heilbrigðiskerfið og innviðina en að fara til dæmis í tillögur sem snúast um flatan niðurskurð í staðinn fyrir að skoða einstök verkefni og hvernig þetta hefur áhrif á þjónustu sé ekki vænleg leið.“

„Nýtt met slegið“

Þingmaður Miðflokks segir fjármálaráðherra taka nokkuð stórt til orða þegar hann minnist á aðhald í tengslum við fjárlög.

„Þessi ríkisstjórn var áður búin að slá öll met í ríkisútgjöldum en nú kynnir hún fjárlagafrumvarp þar sem gert er ráð fyrir áframhaldandi halla og enn nýju meti í útgjöldum ríkisins en segist vera að beita aðhaldi. Og hvers vegna er það? Jú því hún ætli ekki að eyða eins miklu og hún hefði kannski getað hugsað sér og það er kallað aðhald og jafnvel sparnaður,“ sagði Sigmundur Davíð Gunnlaugsson, þingmaður Miðflokksins.

Þér finnst þá ekki mikið um aðhald í þessum tillögum?

„Þessi aðhaldspæling hefur væntanlega áhrif miðað við það ef þau hefðu eytt enn meiri pening og rekið ríkið með enn meiri halla. Mér finnst dálítið langt seilst að kalla það aðhald eða sparnað að menn skuli ekki eyða alveg eins miklu og menn hefðu getað hugsað sér.“

Þá segir hann fjármálaráðherra skauta fram hjá heildarmyndinni.

„Hún er sú að ríkið verður áfram rekið með halla þrátt fyrir þessa miklu tekjuaukningu og nýtt met slegið í ríkisútgjöldum á verðbólgutímum.“