Aftur kölluð út vegna bráðra veikinda í skemmti­ferða­skipi

Ásgeir Erlendsson, upplýsingafulltrúi Landhelgisgæslunnar, segir í samtali við Vísi að vel hafi gengið að hífa sjúklinginn um borð í þyrluna og að hann hafi verið fluttur á Landspítalann í Fossvogi.

Um var að ræða skemmtiferðaskipið Sea Spirit.

Þyrlusveitin var einnig kölluð út vegna bráðra veikinda manns um borð í öðru skemmtiferðaskipi, Celebrity Summit, í gær. Það skip var statt um fimmtíu sjómílur vestur norður af Látrabjargi þegar tilkynning með hjálparbeiðninni barst.

Ásgeir segir útköll sem þessi vera tíð á þessum árstíma. „Það eru mörg skemmtiferðaskip við landið og því fylgja tilkynningar og útköll sem þessi. Það er líka þannig að það er talsvert af eldra fólki um borð í þessum skipum þannig að eðlilegt er að veikindi geti komið upp.“