Sigur­veig úr Ís­lands­banka í Land­stólpa

Sigurveig útskrifaðist með BS-próf í viðskiptafræði frá Háskóla Íslands árið 1998 og var í kjölfarið ráðin sem þjónustustjóri Íslandsbanka á Selfossi. Hún var svo ráðin viðskiptastjóri þar árið 2002.

„Ég hef í störfum fyrir bankann kynnst fjölda fólks og fyrirtækja í öllum atvinnugreinum á svæðinu, þar á meðal Landstólpa,“ er haft eftir Sigurveigu í tilkynningu.

Hún segir að þegar henni hafi boðist starf hjá Landstólpa hafi hún ekki þurft að hugsa sig lengi um. 

„Eigendur þess eru harðduglegir frumkvöðlar með mörg járn í eldinum sem ég hlakka til að starfa með. Meira að segja hlakka ég til þeirrar tilbreytingar að aka daglega í 20 mínútur til og frá vinnustaðnum í stað í stað þess að sækja vinnu í nokkur hundruð metra fjarlægð frá heimilinu!“

Aðsetur Landstólpa er á Gunnbjarnarholti í Skeiða- og Gnúpverjahreppi og er með fjölbreytta starfsemi og þjónustu sem nær til landsins alls. Starfsmenn eru um fjörutíu talsins en auk þess eru um tuttugu verktakar að störfum þar. 

Fram kemur í tilkynningunni að Landstólpi hafi velt um 2,6 milljörðum króna. Helmingur veltunnar hafi verið á mannvirkjasviði og þar hugsar Arnar Bjarki Eiríksson, stofnandi og framkvæmdastjóri Landstólpa, að Sigurveig muni láta til sín taka.

„Sigurveig er grandvör og traust og ég vænti mikils af þekkingu hennar og reynslu, til dæmis við að skerpa á áherslum starfsviðanna hjá okkur og straumlínulaga enn frekar einstaka þætti og reksturinn í heild. Alltaf er gott að fá ferska, utanaðkomandi sýn á uppbyggingu fyrirtækis og starfsemi til að þróa það markvisst, vel og örugglega,“ er haft eftir Arnari.