Birtingin breyti litlu og þingið verði á­fram í fríi

„Það er atriði sem er mér og þinginu ekki viðkomandi og verður að hafa sinn gang,“ segir Birgir aðspurður um bréf Sigurðar, setts ríkisendurskoðanda í málinu, til ríkissaksóknara. En Sigurður vill að saksóknari rannsaki Lindarhvol. Birgir, sem hefur lagst gegn birtingunni, segir að Sigurður verði sjálfur að svara fyrir það. „Ég get ekki verið að geta í einhverjar eyður um það,“ segir hann.

Þórhildur Sunna Ævarsdóttir, þingflokksformaður Pírata, birti greinargerðina á vefsíðu flokksins í dag. Hún sagðist hafa fengið hana senda í tölvupósti.

Miðflokkurinn hefur óskað eftir því að þing komi saman úr sumarfríi til þess að fjalla um innihald hennar. Birgir gerir ekki ráð fyrir því að það gangi eftir.

„Til þess að kalla þing saman á miðju sumri þá þarf að koma til bréf frá forseta Íslands sem annað hvort byggir á ósk frá forsætisráðherra fyrir hönd ríkisstjórnar eða frá meirihluta þingmanna,“ segir hann. „Ég geri ekki ráð fyrir því að það sé neitt tilefni til þess.“

Atriðin komið fram áður

Birgir segist gera ráð fyrir að öll þau atriði sem vikið er að í greinargerðinni hafi á einhverjum tímapunkti komið fram í opinberri umræðu áður.

„Mér sýnist í fljótu bragði þau gagnrýnisatriði sem Sigurður Þórðarson setti fram á sínum tíma hafi komið fram í fjölmiðlaumfjöllun á undanförnum fimm árum,“ segir Birgir.

Hann á ekki von á því að birtingin breyti neinu hvað varðar umræðu þingsins um Lindarhvolsmálið.

„Skýrsla Ríkisendurskoðunar um málefni Lindarhvols frá vorinu 2020 er til meðferðar í stjórnskipunar- og eftirlitsnefnd og ég geri ráð fyrir því að hún haldi þeirri vinnu áfram,“ segir Birgir. „Ég á ekki von á því að birting greinargerðarinnar núna muni hafa nein sérstök áhrif á þá málsmeðferð vegna þess að menn í nefndinni hafa fram að þessu átt þess kost að kynna sér innihald þessa plaggs.“ Það verði hins vegar að koma í ljós hvaða stefnu vinna nefndarinnar tekur.

Hvað birtinguna sjálfa varðar segir Birgir að það gildi ákveðnar reglur um þau trúnaðarskjöl sem þinginu berst. Það sé ekki í valdi einstakra nefndarmanna að ákveða opinbera birtingu jafn vel þó þeir hafi fengið gögnin með öðrum leiðum, svo sem í tölvupósti.

Tekur ekki afstöðu til efnisins

Aðspurður um afleiðingar segir Birgir að það eigi eftir að ræða það innanhúss á þinginu.

„Ég þarf að ráðfæra mig við embættismenn þingsins og svo þurfum við að ræða þetta í forsætisnefnd, hvaða afleiðingar þetta hefur. En mér sýnist að staðan sé sú að þetta sé ekki í samræmi við reglur þingsins um meðferð trúnaðarupplýsinga,“ segir hann.

Hvað má ekki sjást?

„Ég hef aldrei tekið neina efnislega afstöðu til þess,“ segir Birgir. „Þetta hefur verið deilumál frá árinu 2018 hvort þessi greinargerð eigi að vera opinber eða ekki. Lögin um ríkisendurskoðanda gera ráð fyrir því að ríkisendurskoðandi hafi síðasta orðið um það hvort að gögn sem unnin eru á meðan vinnslu einstakra mála stendur verði birt eða ekki. Í þessu máli liggur fyrir skýr afstaða ríkisendurskoðanda. Hann hefur lagst gegn birtingunni. Mér hefur ekki þótt tilefni til þess að ganga gegn þeirri skýru afstöðu ríkisendurskoðanda.“