Fram­kvæmda­stjóri Dia­geo er látinn

Í tilkynningu frá fyrirtækinu, sem send var út í gær, segir að Menezes hafi andast í faðmi fjölskyldu sinnar eftir stutt veikindi. Fyrr í vikunni hafði verið greint fra því að Menezes væri á sjúkrahúsi vegna magasárs. Til stóð að hann myndi láta af störfum sem framkvæmdastjóri í lok mánaðar.

Diageo framleiðir um tvö hundruð tegundir af áfengi og selur í um 180 löndum. Meðal vörumerkja sem Diageo framleiðir má nefna Johnnie Walker vískí, Bailey's, Guinness-bjór, Smirnoff vodka, auk þess að eiga stóran hlut í Moët Hennessy.

Í frétt BBC segir að Menezes hafi verið breskur og bandarískur ríkisborgari en fæðst í indversku borginni Pune.

Javier Ferrán, stjórnarformaður Diageo, segir að um gríðarlega sorglegan dag sé að ræða, enda hafi Menezes verið einn besti leiðtogi sinnar kynslóðar. „Ivan var á staðnum þegar Diageo var stofnað fyrir rúmum 25 árum, mótaði Diageo sem varð að einu skilvirkasta, traustasta og virtasta fyrirtæki heims,“ segir Ferrán.

Menezes gekk til liðs við Diageo árið 1997 þegar félagið var stofnað með sameiningu bruggrisans Guinness og Grand Metropolitan-samsteypunnar. Hann gegndi fjölmörgum stjórnunarstöðum innan fyrirtækisins áður en hann tók við stöðu aðalframkvæmdastjóra árið 2013.

Áður en Menezes hóf störf hjá Diageo starfaði hann hjá Nestlé.