Unnur Birna aftur ófrísk

„Við vorum í algjöru sjokki enda hvorug meðgangan plönuð," segir Unnur spurð um líðanina í þetta skiptið. 

„Ég gleymi því reglulega að ég sé ófrísk. Ég finn sem betur fer ekkert fyrir þessu, engin ógleði eða aðrir leiðindar fylgikvillar sem margar konur tala um. Nema ég er með brjálað nefrennsli sem hlýtur að fara að rjátla af mér. Eina breytingin eru fötin sem eru aðeins farin að þrengja að mér upp á síðkastið."

Unnur Birna og Sigurgeir Skafti Flosason, sambýlismaður hennar, eiga fyrir dótturina Náttsól Viktoríu tæplega þriggja ára en Unnur Birna ræddi um meðgöngu og fæðingu hennar í einlægu viðtali við Fréttablaðið í júní árið 2021. 

„Ég vildi aldrei láta taka myndir af mér óléttri því ég vildi gleyma tilhugsuninni um að ég væri það," segir Unnur Birna þegar hún rifjar upp fyrri meðgöngu. Það sama á við núna. „Ég hef bara tekið þessa einu og er í raun aðeins með hausinn ofan í sandinum hvað þetta allt saman varðar. Ég tek bara einn dag fyrir í einu, svona eins og með allt annað í lífinu - annað er ekki hægt."

Svo gaman að gera þetta saman

Í þetta sinn er yngri systir Unnar Birnu, söngkonan Dagný Halla er samferða henni á meðgöngunni en hún gengur með sitt fyrsta barn. Unnur Birna segir það ákaflega ánægjulegt að fara í gegnum þetta ferðalag með systur sína sér við hlið. „Það er svo gaman að við séum ófrískar á sama tíma. Hún er eins og önnur mamma Náttsólar Viktoríu og á eftirlaust eftir að sóma sér vel sem móðir sjálf."

Spurð hvort kvíðinn sé á undanhaldi að þessu sinni segist Unnur Birna hafa í byrjun átt erfitt með að sætta sig við að ferlið væri að hefjast aftur á ný. 

„Ég fór strax í það að hugsa, þetta verður ekki svona auðvelt í þetta skiptið, eins og það var síðast. Því síðasta meðganga gekk vonum framar. Ég get ekki verið svo heppin aftur. En hingað til hefur þetta gengið mjög vel og við vonum það besta."

Unnur Birna og Skafti tilkynntu um fjölgun fjölskyldunnar í færslu á Facebook síðu sinni en þar segir orðrétt:

Í byrjun september ætlum við Sigurgeir Skafti að gefa út barnabók í tveimur bindum sem mun bera nafnið ,,Náttsól og Mánudagur” eða ,,Nightsun & Moonday”, ævilangt ævintýri í lygasögustíl.

Fyrsta bindi kom út 2020 en við erum búin að vera að skrifa 2. bindið í hátt í hálft ár núna og er útgáfa áætluð í kringum afmælisdag afa Bassa, en það getur auðvitað varíerað svona um einhverja daga.

Svona gerist þegar þú setur pergamentrúlluna nálægt göldróttum fjaðurstaf, ævintýrin skrifa sig bókstaflega sjálf!

Þess má geta að 2. bindi verður, líkt og hið fyrsta, gefið út af Landsspítalanum.