Sveindís og stöllur fengu skell og titillinn að renna þeim úr greipum

Sveindís var í byrjunarliði Wolfsburg í dag, en var tekin af velli í hálfleik þegar staðan var þegar orðin 2-0, Frankfurt í vil. Nicole Anyomi skoraði seinna mark heimakvenna eftir að Ewa Pajor hafði orðið fyrir því óláni að setja boltann í eigið net.

Laura Freigang skoraði svo tvívegis fyrir Frankfurt í síðari hálfleik og þar við sat. Lokatölur 4-0 og Sveindís og stöllur hennar þurfa nú á kraftaverki að halda til að verja þýska meistaratitilinn.

Wolfsburg situr í öðru sæti deildarinnar með 51 stig þegar tvær umferðir eru eftir af tímabilinu, fjórum stigum á eftir Íslendingaliði Bayern München sem trónir á toppnum. Frankfurt situr hins vegar í þriðja sæti með 48 stig.