Back­street kallarnir aldrei verið nánari og hlakka til að skoða Ís­land

Þeir stefna nú til Íslands en þeir eru að fara á síðasta legg tónleikaferðalags síns DNA World Tour, sem þurfti að stöðva vegna heimsfaraldursins. En nú fá þeir loks að halda áfram, byrja hér á Íslandi og halda svo til suðrænni slóða.

„Þetta er svo spennandi! Nokkrir okkar ætla að koma fyrr til landsins til þess að fá að upplifa landið, upplifa Ísland,“ segir AJ McLean, einn meðlimur Backstreet Boys. 

Hann hafi langað að sjá norðurljós þó hann sé ekki vongóður um að sjá þau á þessum árstíma. Það saki þó ekki, nóg annað sé að sjá.

„Það eru íshellarnir, það er Bláa lónið, fossarnir, það er svo margt. Ég vil tvímælalaust prófa matinn. Ég vil bara upplifa Ísland eins og það er.“

Sveitin fagnaði þrjátíu ára afmæli 20. apríl. AJ segir samstarfið bara hafa batnað með árunum.

„Við erum sennilega nánari núna en við höfum áður verið í þessi þrjátíu ár,“ segir AJ. 

„Með hjálp aðdáendanna, tónlistarinnar og sambandsins sem við höfum hver við annan héldum við áfram og hér erum við þrem áratugum síðar, enn að ferðast um heiminn, enn selst upp á tónleikana okkar og enn erum við að gefa út tónlist.“