Leikmanna- og þjálfaraferli Arnars með landsliðinu lauk á sama stað

KSÍ tilkynnti í gær að Arnari hefði verið sagt upp störfum sem landsliðsþjálfara. Hann tók við landsliðinu í lok árs 2020 og stýrði því í 31 leik. Aðeins sex þeirra unnust.

Síðasti leikur Arnars sem landsliðsþjálfara var stórsigurinn á Liechtenstein, 0-7, í undankeppni EM 2024 um helgina. Leikurinn fór fram á Rheinpark vellinum í Vaduz, höfuðborg Liechtenstein.

Svo vill til að síðasti landsleikur Arnars sem leikmanns íslenska landsliðsins var einnig á Rheinpark vellinum 17. október 2007. Ísland tapaði leiknum með þremur mörkum gegn engu en þetta er almennt talin ein svartasta stund í sögu landsliðsins, kannski ásamt 14-2 tapinu fyrir Danmörku á Parken 1967.

Arnar á því eflaust ekkert alltof góðar minningar frá Rheinpark vellinum þar sem bæði leikmanna- og þjálfaraferli hans með landsliðinu lauk.

Þess má þó geta að þrír af sex sigrum Arnars sem landsliðsþjálfara komu gegn Liechtenstein. Tveir í undankeppni HM 2022 og svo stórsigurinn á sunnudaginn.