Erlent

Hundruð látin eftir risaskjálfta í Tyrklandi og Sýrlandi

Gunnar Reynir Valþórsson skrifar
Fólk reynir að komast að fólki sem er fast í rústum húss í Adana í Tyrklandi í morgun. 
Fólk reynir að komast að fólki sem er fast í rústum húss í Adana í Tyrklandi í morgun.  IHA agency via AP

Óttast er að hundruð hafi látið lífið eftir að gríðarlega öflugur jarðskjálfti reið yfir Tyrkland og Sýrland í nótt. Skjálftinn átti upptök sín í suðausturhluta Tyrklands, rétt við sýrlensku landamærin og var hann 7,8 stig að stærð.

Tugir eftirskjálfta hafa fylgt þeim stóra. Tyrkland hefur lýst yfir neyðarástandi í landinu og er fólk hvatt til að nota ekki farsíma svo björgunarsveitir geti haft aðgang að kerfinu og samræmt aðgerðir sínar. Allar líkur eru taldar á því að tala látinna eigi eftir að hækka til muna.

Sýrlensk yfirvöld hafa gefið það út að þar í landi séu rúmlega hundrað látnir og mörg hundruð sárir. Að auki reið skjálftinn yfir í héröðum sem eru í höndum uppreisnarmanna í landinu þar sem heilbrigðisþjónusta er bágborin og lítið um björgunaraðila.

Tyrknesk yfirvöld hafa staðfest að 76 séu látnir og tæplega 500 sárir. Skjálftinn fannst greinilega í öðrum löndum í nágrenninu, til að mynda í Líbanon, á Gaza ströndinni og á Kýpur.

Tyrkland Sýrland Náttúruhamfarir Jarðskjálfti í Tyrklandi 6. febrúar 2023

Mest lesið


Fleiri fréttir

Sjá meira


×

Mest lesið