Úr bæjar­stjóra­stól í for­stjóra­stól OR

Þetta kemur fram í tilkynningu frá Orkuveitunni. Sævar Freyr mun taka við af Bjarna Bjarnasyni sem verið hefur forstjóri undanfarin tólf ár.

Í tilkynningu Orkuveitunnar segir að Sævar Freyr búi yfir mikilli reynslu og þekkingu eftir að hafa stýrt stórum fyrirtækjum og nú síðast sveitarfélagi. 

Sævar Freyr hefur meðal annars starfað sem forstjóri Símans, 365 miðla og nú síðast sem bæjarstjóri. 

„Þar sem Akraneskaupstaður er einn eigenda OR, hefur Sævar Freyr haft hlutverki að gegna gagnvart fyrirtækinu, sem bæjarstjóri. Hann hefur meðal annars stutt við framgang Carbfix og nýtt reynslu sína og bakgrunn í verkefnum tengdum Ljósleiðaranum,“ segir í tilkynningunni.

Sævar er með cand.oecon gráðu í viðskiptafræði frá Háskóla Íslands með áherslu á markaðsmál. Starfsreynsla Sævars telur hátt í þrjátíu ár og hefur hann verið stjórnandi nær allan þann tíma. Hann starfaði hjá Símanum í 18 ár og þar af sjö ár sem forstjóri. Hann var forstjóri 365 miðla í þrjú ár en frá árinu 2017 hefur hann gegnt stöðu bæjarstjóra í heimabæ sínum Akranesi.

Í tilkynningu frá Akranesbæ er Sævari þakkað fyrir góð störf í þágu Akraness. Leitað verði að nýjum bæjarstjóra en í millitíðinni muni Steinar Adolfsson, sviðsstjóri fjármála- og þjónustusviðs,  gegna starfinu eftir að Sævar lýkur störfum og þar til nýr bæjarstjóri tekur til starfa.