Áttundi sigur ÍBV í röð sem er nú jafnt Val á toppnum

ÍBV hefur verið að gera góða hluti í Olís-deild kvenna að undanförnu og meðal annars unnið bæði Val og Stjörnuna á útivelli í síðustu tveimur leikjum. Haukar voru í fimmta sæti deildarinnar fyrir umferðina í dag, fimm stigum á eftir Fram.

Það voru þó gestirnir í Haukum sem byrjuðu betur í dag. Þær voru með frumkvæðið í upphafi og náðu mest þriggja marka forystu í fyrri hálfleik. Undir lok hálfleiksins náði ÍBV áhlaupi, komst í fyrsta sinn yfir í stöðunni 13-12 og leiddi með einu marki yfir í hálfleik.

Eyjakonur byrjuðu svo síðari hálfleikinn af krafti. Þær skoruðu fyrstu fjögur mörkin og lögðu grunninn að sigrinum. Haukar náðu aldrei að koma til baka og forysta ÍBV varð mest sjö mörk. Lokatölur 30-28 og eftir jafntefli Vals og Stjörnunnar í dag eru ÍBV og Valur nú jöfn að stigum á toppi deildarinnar.

Hrafnhildur Hanna Þrastardóttir var markahæst hjá ÍBV í dag með tíu mörk og Birna Berg Haraldsdóttir skoraði sjö mörk. Hjá Haukum skoraði Elín Klara Þorkelsdóttir átta mörk og Ragnheiður Ragnarsdóttir sex.

KA/Þór í fimmta sætið

Þá fékk KA/Þór heimsókn frá HK til Akureyrar í leik tveggja liða í neðri hluta deildarinnar. Leikurinn var jafn til að byrja með en KA/Þór komst fjórum mörkum yfir í stöðunni 9-5 rétt um miðjan fyrri hálfleikinn. Í leikhléi var staðan 14-8 heimakonum í vil og brekkan orðin nokkuð brött fyrir gestina úr Kópavoginum.

KA/Þór hélt síðan frumkvæðinu allan síðari hálfleikinn. HK minnkaði muninn mest niður í þrjú mörk en þá setti KA/Þór í næsta gír og vann að lokum öruggan átta marka sigur, lokatölur 25-17.

Markahæst í liði KA/Þór var Rut Jónsdóttir með sjö mörk en Nathalia Soares Baliana skoraði fimm. Inga Dís Jóhannsdóttir var hins vegar markahæst á vellinum en hún skoraði níu mörk fyrir HK.

Matea Lonac var með 35% markvörslu í liði KA/Þór en Margrét Ýr Björnsdóttir varði 32% þeirra skota sem hún fékk á sig í marki HK.