Stúlkurnar sem létust í Spydeberg voru tví­bura­systur

Í morgun var greint frá því að tvær stúlkur á táningsaldri hefðu fundist látnar í heimahúsi í Spydeberg í Noregi í nótt og sú þriðja verið flutt á sjúkrahús. Talið var að þær kynnu að hafa innbyrt of stóran skammt fíkniefna.

Norski miðillinn VG greinir frá því að stúlkurnar sem létust hafi heitað Mina Alexandra og Mille Andrea Hjalmarsen. Þær hafi verið sextán ára tvíburasystur. Þetta er haft eftir lögreglunni á svæðinu.

Karlmaður á þrítugsaldri, sem var á heimilinu þegar lögreglu bar að garði, var handtekinn á staðnum og kærður fyrir að koma stúlkunum ekki til bjargar. Kærunni á hendur honum hefur nú verið breytt í kæru fyrir manndráp af gáleysi.

Þá hefur annar maður verið handtekinn og kærður fyrir að hafa selt stúlkunum tveimur fíkniefnin sem talið er að þær hafi innbyrt, að því er haft eftir Lars Reinholdt-Østby lögreglustjóra.