Einn úr á­höfn taí­lenska her­skipsins fannst á lífi

HTMS Sukhothai, 35 ára gömul korvetta, sökk með 105 manns um borð í stórsjó í Taílandsflóa á sunnudag. AP-fréttastofan segir að taílenski herinn hafi staðfest að 76 manns hafi verið bjargað, fimm hafi fundist látnir og 24 sé enn saknað.

Sjóliðinn og líkin fimm fundust um sextíu kílómetrum frá þeim stað þar sem skipið sökk. Hann sást fljótandi í sjónum um miðjan dag í gær. Flutningaskip sem átti leið hjá bjargaði honum úr sjónum en herfreigáta flytur hann nú í land. Ástand hans er sagt slæmt.

Vonir um að fleiri finnist á lífi fara nú þverrandi. Sjóherinn telur ólíklegt að nokkur gæti lifað lengur en tvo daga í sjónum. Fjögur stór herskip, flugvélar, þyrlur og drónar eru notaðir við leitina. Ekki hefur verið hægt að leita á minni fleyjum þar sem enn er vont í sjóinn á svæðinu.

Þeir sem komust lífs af hafa sagt taílenskum fjölmiðlum að ekki hafi verið nógu mörg björgunarvesti þar sem skipið var með gesti auk hefðbundinnar áhafnar. Herinn segir að vanalega séu 87 sjóliðar og foringjar um borð í skipinu.