„Hef ekki enn þá horft á hrekkinn“

Eitt af því sem Rikki ræddi um í þættinum hrekkur sem Auðunn Blöndal tók á hann í Stóra Sviðinu á Stöð 2 á dögunum. Þar var Rikki staddur á Stjörnuvellinum og hélt að hann væri í beinni útsendingu með Mána Péturssyni. Máni var vægast sagt erfiður viðmælandi og Ríkharð í ómögulegri stöðu. Hrekkurinn sló rækilega í gegn og fór eins og eldur í sinu um netheima í kjölfarið.

„Ég hef ekki enn þá horft á hrekkinn og veit ekki hvort ég muni einhvern tímann geta það,“ segir Rikki og heldur áfram.

„Ég veit ekki hvað þetta voru margar mínútur sem stóð þarna með Mána en mér leið eins og þetta hafi verið heill fótboltaleikur. Máni er búinn að vera edrú í einhverja áratugi og ég sagði í sjónvarpinu að ég héldi að hann væri að fá heilablóðfall en í sannleika sagt hélt ég að hann væri fallinn. Hann lék þetta svo ótrúlega vel.“

Umræðan um hrekkinn fræga hefst þegar 24 mínútur eru liðnar af þættinum.