Út­breiddustu mót­mæli í Kína í rúm­lega þrjá­tíu ár

Afar fátítt er að mótmæli af þessu tagi brjótist út enda geta afleiðingarnar fyrir mótmælendur verið alvarlegar. AP-fréttastofan segir að fólk hafi ekki aðeins mótmælt sóttvarnaaðgerðum almennt heldur hafi sumir kallað eftir afsögn Xi Jinpings forseta og falli Kommúnistaflokksins sem hefur stýrt landinu með harðri hendi í 73 ár. 

Mótmælin blossuðu upp í kjölfar eldsvoða sem varð tíu manns að bana í borginni Urumqi í vestanverðu landinu. Samkvæmt almannarómi komu sóttvarnareglur í veg fyrir að fólkið kæmist út úr brennandi byggingunni.

Kommúnistastjórnin hefur sagt að aðgerðir til að hefta útbreiðslu faraldursins ættu að vera hnitmiðaðar og raska daglegu lífi fólks eins lítið og mögulegt er. Þess sjást þó ekki merki í aðgerðum borgar- og héraðsstjórna. Embættismönnum flokksins er hótað refsingum eða brottrekstri ef faraldur brýst út í umdæmi þeirra og því grípa þeir heldur til harkalegri aðgerða.

Fram að þessu hafa viðbrögð stjórnvalda við mótmælunum verið tiltölulega takmörkuð, að sögn AP. Lögregla í Sjanghæ notaði táragas til þess að tvístra hópum mótmælenda og einhverjir voru handteknir og færðir burt í rútu.  Öryggislögregla Kína er þó sögð fræg fyrir að þefa uppi andófsfólk og handtaka það þegar fáir sjá til.

„Við vonumst til þess að binda enda á samkomutakmarkanirnar. Við viljum lifa eðlilegu lífi. Við ættum öll að tjá tilfinningar okkar af hugrekki,“ sagði mótmælandi að nafni Shi við Reuters í Beijing í gærkvöldi.

Ritskoða myndir af grímulausum fótboltaáhorfendum

Þá segir breska ríkisútvarpið BBC að lögreglumenn hafi barið fréttamann, sparkað í hann og handtekið þegar hann fylgdist með mótmælum í Sjanghæ. Yfirvöld hafi reynt að halda því fram að fréttamaðurinn hefði verið handtekinn svo að hann smitaðist ekki af Covid19 í mannþrönginni.

Yfirvöld í Sjanghæ byrjuðu í dag að setja upp bláar öryggisgirðingar í kringum miðborgina þar sem hundruð manna komu saman um helgina, að sögn Reuters-fréttastofunnar. Ekkert bólaði á frekari mótmælum í Beijing eða Sjanghæ þegar birti af degi í dag.

Ritskoðarar kínverska ríkisins hafa verið í yfirvinnu við að eyða myndböndum af mótmælum og stuðningsyfirlýsingum við þau af netinu um helgina. 

BBC segir að það séu ekki aðeins mótmælin sem eru ritskoðuð heldur sjónvarpsmyndir frá heimsmeistaramótinu í knattspyrnu í Katar. Sumir landsmenn reiddust stjórnvöldum þegar þeir sáu myndir úr stúkunum í Katar þar sem enginn var með sóttvarnagrímur og settu spurningamerki við aðgerðirnar heima fyrir. Fyrir vikið eru nærmyndir af áhorfendum þú klipptar út úr útsendingu frá mótinu á ríkissjónvarpsstöðinni CCTV. Þá er útsending hálfri mínútu eftir á til að gefa ritskoðurum svigrúm til að gera sitt.