Sýndi stuðnings­mönnunum fingurinn eftir að þeir létu eigin­manninn heyra það

Upton er gift Justin Verlander, leikmanni Houston Astros, sem mætir Philadelphia Phillies í úrslitunum. Hún var eitthvað pirruð út í stuðningsmenn Phillies í fimmta leik liðanna á föstudaginn og fékk á endanum nóg eftir að þeir létu Verlander ítrekað heyra það.

Upton stóð upp og rak löngutöng beggja handa upp í loft. Stuðningsmenn Phillies kipptu sér þó lítið upp við þetta uppátæki Uptons.

Hún gat þó leyft sér að brosa í leikslok enda vann Astros leikinn, 3-2. Liðið tryggði sér svo meistaratitilinn með sigri í sjötta leiknum, 4-1. Þetta var annar meistaratitill Astros en liðið varð einnig meistari fyrir fimm árum.

„Þetta er svo ótrúleg upplifun. Og að fá Justin heim og vera saman sem fjölskylda er svo frábært,“ sagði Upton eftir að Astros tryggði sér titilinn.