Ráðast í úttekt á Sælukoti og taka arðgreiðslur til skoðunar

Fyrrverandi leikskólastjóri, tveir fyrrverandi starfsmenn og móðir sögðu í aðsendri grein á Vísi í síðustu viku að stjórnendur leikskólans hefðu keypt sér raðhús árið 2019 og greitt sér á fimmta tug milljóna króna árið 2020. Á sama tíma hafi leikskólastarfið verið í miklu fjársvelti.

Elín Halldórsdóttir, leikskólastjóri á Sælukoti, svaraði pistlinum á sama vettvangi. Hún sagði fjölmiðla blása til stórsóknar undir yfirskini fyrrnefndar aðsendrar greinar. Hún sagði skólann hafa starfað í 46 ár og greinin væri uppfull af uppspuna og ósannindum. Fullyrðingar úr greininni varðandi húsnæðiskaup og arðgreiðslur voru þó ekki leiðréttar.

Ásökun um kynferðisbrot

Málefni Sælukots hafa verið töluvert í deiglunni undanfarin misseri. Ásakanir á hendur starfsmanni vegna kynferðisbrot komst í fréttirnar. Margrét Eymundsdóttir, ein þeirra sem skrifa greinar og gagnrýna starfið í Sælukoti, var leikskólastjóri þegar málið kom upp. Hún segir það hins vegar hafa verið þaggað niður af rekstrarstjóra skólans og meintur gerandi áfram skipt um bleyjur á börnum.

Gerandinn var meðal annars sakaður um að hafa kysst þriggja ára stúlku fullorðinskossi. Móðir barnsins sagði í viðtali við Stöð 2 í fyrra að stjórn leikskólans og Reykjavíkurborg hefðu brugðist í málinu. Lögmaður Sælukots tjáði fréttastofu í fyrra að Barnavernd Reykjavíkur hefði lokað málinu án athugasemda. Móðirin kærði málið til lögreglu.

Þetta var í nóvember 2021 og sagði Reykjavíkurborg á þeim tíma að mál skólans væru til skoðunar hjá Reykjavíkurborg.

„Starfsemi leikskólans Sælukots hefur verið til skoðunar og úrvinnslu hér á sviðinu á liðnum mánuðum og við erum raunar bara að leggja mat á að hvaða mati við getum veitt skýrari og betri leiðsögn til þeirra sem bera ábyrgð á starfsemi leikskólans, sem við erum búin að gera bæði með samtali og eftirlitsheimsóknum, en við fylgjum þessu máli fast eftir,“ sagði Helgi Grímsson, sviðstjóri skóla- og frístundarsviðs Reykjavíkurborgar, á þeim tíma.

Öryggi barna í lagi

Síðan eru liðnir tíu mánuðir. Fréttastofa hafði samband við sviðið og spurði hvernig málinu liði. Í svari frá Hjördísi Rut Sigurjónsdóttur, upplýsingafulltrúa á sviðinu, segir að ábendingar um aðbúnað og starf í leikskólanum hafa verið teknar alvarlega. Ytra mat hafi verið gert á leikskólanum 2016 út frá gæðaviðmiðum um leikskóla.

„Í skýrslu ytra matsins voru gerðar athugasemdir og í kjölfar þess gerði leikskólinn áætlun um umbætur.“

Þá segir að sérfræðingar skóla- og frístundasviðs fari árlega í eftirlit í alla sjálfstætt starfandi leikskóla Reykjavíkurborgar.

„Vegna athugasemda hefur verið farið í fleiri eftirlitsheimsóknir í Sælukot. Síðasta vetur (2021-2022) fóru sérfræðingar sviðsins í fjórar eftirlitsferðir til viðbótar við árlegt eftirlit til að kanna aðbúnað og líðan barna, síðast í maí 2022. Þær heimsóknir sýndu að öryggi væri í lagi og að börnunum virtist líða vel. Helst mátti gagnrýna að ekki var faglærður leikskólastjóri í fullu starfi,“ segir í svari borgarinnar.

Spámiðill og orkuheilari

Elín Halldórsdóttir er leikskólastjóri í Sælukoti sem rekinn hefur verið af Ananda Marga samtökunum. Töluverð áhersla er lögð á hugleiðslu og kyrjun. Elínu eru andleg málefni greinilega hugleikin en hún titlar sig spámiðil og orkuheilara auk þess að vera myndlistar- og tónlistarkona.

Reykjavíkurborg segir að þrátt fyrir þá niðurstöðu að öryggi og líðan barna væri í lagi hafi verið ákveðið að ytra mat yrði gert á leikskólanum að nýju.

„Sú ákvörðun byggir á sögu umkvartana sem snýr að leikskólanum og sú vinna sett á dagskrá nú í haust. Óskað hefur verið eftir kostnaðartilboði frá tveimur fyrirtækjum til að taka leikskólann út. Fram undan er heildarendurskoðun á samningum borgarinnar við sjálfstætt starfandi leikskóla sem renna út um næstu áramót. Meðal annars verður farið yfir reglur um arðgreiðslur og samræmingu innritunar borgarrekinna og sjálfstætt starfandi leikskóla.“

Fréttin hefur verið uppfærð.