Aron Mola og Sigrún Ósk verða kynnar Idolsins

Feta í fótspor Simma og Jóa

„Það er gríðarlega mikill heiður fyrir mig að fá hlutverk kynnis í jafnstórum þætti og Idolið er,“ segir leikarinn Aron Már í samtali við Lífið á Vísi. 

„Sjálfur ólst ég upp við Idol-æðið sem reið yfir Íslendinga fyrir tæpum tuttugu árum síðan og horfði á alla þættina sem lítill strákur. Aldrei hefði mér dottið í hug að einn daginn myndi ég stíga í sömu spor og Simmi og Jói stigu á sínum tíma,“ segir hann um þær fjórar seríur sem sýndar voru á Stöð 2 á árunum 2003 til 2009.

Sigrún Ósk tekur í sama streng: „Ég hlakka mjög mikið til að fá að taka þátt í þessu Idol ævintýri enda aðdáandi þáttanna til margra ára. Það er eitthvað við það að uppgötva nýtt hæfileikafólk og sjá það stíga sín fyrstu skref á stóra sviðinu með öllum þeim taugatitringi sem því fylgir. 

Ég held það sé líka kominn tími á svona þátt, það er langt síðan síðast og maður veit að það leynist alls staðar fólk sem kann að syngja.“

Með þungavigtarbeltið í dagskrárgerð

Aron er einnig spenntur að takast á við verkefnið með Sigrúnu sér við hlið. 

„Það er mikill heiður að Sigrún Ósk sé með mér í þessu og eiginlega nauðsynlegt þar sem hún er með þungavigtarbeltið í dagskrárgerð,“ segir Aron um Sigrúnu sem hefur meðal annars hlotið Edduverðlaunin fyrir störf sín í sjónvarpi.

„Ég held að þetta teymi geti ekki klikkað. Ef það gerist býst ég fastlega við því að það verði þá ég. Ég er mjög spenntur fyrir þessu tækifæri og hlakka til að halda á þessu stóra hjarta með öllum þeim sem munu taka þátt,“ segir Aron að lokum í glensi.

Sigrún gefur dómnefndinni fimm stjörnur og segir reynslu mikið fólk á bak við tjöldin og að öllu verði tjaldað til við gerð þáttanna.

Spennt að sjá Aron í nýju hlutverki

Sigrún sér aðeins einn galla við það að vera kynnir í þáttunum. 

„Það verður spennandi að sjá Aron Mola í nýju hlutverki. Eiginlega finnst mér eini gallinn við að vera með að geta ekki notið þess að horfa í sófanum heima! 

Maður er alltaf svo þakklátur fyrir allt sem fjölskyldan getur sameinast í að horfa á.

Næst á dagskrá eru dómaraprufurnar

Í síðustu viku kláruðust framleiðendur þáttanna hringferð sína um landið og lokað hefur verið fyrir rafræna skráningu. Næst á dagskrá eru því dómaraprufur sem hefjast í september og beinar útsendingar af keppninni í framhaldi af því. Keppendur í ár eru á aldrinum á aldrinum 16 til 30 ára.

Líkt og áður hefur verið greint frá sitja þau Birgitta Haukdal, Daníel Ágúst, Bríet og Herra Hnetusmjör í dómnefndinni.