Á þriðja tug látnir eftir sprenginguna í Kabúl

Khalid Zadran, talsmaður lögreglu, segir að sprengingin hafi orðið þegar kvöldbænir stóðu yfir í moskunni og er imam moskunnar sagður vera í hópi hinna látnu.

Enn hefur enginn lýst yfir ábyrgð á sprengingunni, en liðsmenn hryðuverkasamtakanna ISIS hafa að undanförnu látið til skarar skríða í afgönsku höfuðborginni. 

Þannig drápu liðsmenn samtakanna Rahimullah Haqqani, þekktan klerk sem var stuðningsmaður stjórnar Talibana í landinu, fyrir um viku í sjálfsvígssprengjuárás.

Í frétt BBC segir að liðsmenn ISIS og Talibana eigi nú í hatrömmum átökum í landinu, um ári eftir að Talibanar náðu tökum á landinu eftir brottför Bandaríkjahers á síðasta ári.