„Snýst um að leyfa andrúmsloftinu ekki að kyrkja okkur til dauða“

Ari Sigurpálsson skoraði eina mark leiksins í fyrri viðureigninni í Víkinni fyrir sléttri viku þar sem Víkingur vann frækinn 1-0 sigur gegn afar sterku liði Lech Poznan.

Arnar sat fyrir svörum fyrir síðari leikinn sem fer fram í kvöld og var léttur. Aðspurður af pólskum blaðamanni um leikplan Víkinga fyrir leikinn sagði hann:

„Ég læt þig bara hafa leikplanið okkar, og þú getur svo sýnt þjálfara Poznan það,“ sagði Arnar og brosti við.

Á alvarlegri nótum sagði hann: „Við erum með DNA í okkar liði, við reynum að verjast ofarlega á vellinum, með háa varnarlínu og reynum að stíga upp og pressa með mikla orku í okkar leik,“

„Hafandi sagt það, við munum reyna það á morgun [í dag] en ég held að við munum þurfa að þjást [e. suffer] aðeins meira í leiknum en við gerðum í leiknum í Reykjavík. Þeir eru mjög gott lið og spilandi á heimavelli munu þeir mæta í bullandi sókn frá byrjun og reyna að setja okkur undir pressu. Svo við munum þurfa að þjást, og þjást til fullkomnunar til að eiga möguleika. Vonandi mun það ganga eftir en á sama tíma verðum við að reyna að spila okkar leik,“ segir Arnar.

Mikilvægt að halda haus í fjandsamlegu andrúmslofti

Arnar segir þá mikilvægast fyrir Víkingana að halda einbeitingu í leiknum, að halda haus og spila sinn leik við erfiðar aðstæður. Hann býst við miklum látum í stuðningsmönnum Poznan en félagið tilkynnti í vikunni að allir ársmiðahafar myndu fá frítt á leikinn, í von um að draga sem flesta á völlinn og mynda sér forskot á Víkinga með tólfta manninum.

„Stundum er vandamálið hjá okkur á Íslandi, þar sem ekki allir eru atvinnumenn, að það er skortur á einbeitingu. Ef þú lítur á mörkin sem við höfum fengið á okkur í síðustu leikjum er skorturinn á einbeitingu augljós,“ segir Arnar.

„En við höfum tekið einbeitinguna upp á hærra stig í Evrópuleikjunum, þá er einbeitingin á hæsta stigi. Ég held þess vegna að þetta snúist um að takast á við verkefnið. Mér hefur verið sagt að aðdáendurnir hér séu klikkaðir á góðana hátt, þeir eru mjög háværir, svo þetta snýst um að halda taugunum rólegum, vera slakir, spila okkar leik og ekki leyfa andrúmsloftinu að kyrkja okkur til dauða,“ segir Arnar en allan blaðamannafundinn má sjá í spilaranum að ofan.

Leikur Víkings og Lech Poznan hefst klukkan 18:30 og verður sýndur beint á Stöð 2 Sport.

Breiðablik á einnig leik í keppninni í kvöld gegn Istanbul Basaksehir í Tyrklandi. Blikar eru 3-1 undir í einvíginu en leikur liðanna hefst klukkan 17:45 á Stöð 2 Sport 4.