Loft­brú niður­greitt flug fyrir sjö hundruð milljónir króna

Verkefnið fór af stað í september árið 2020 en samkvæmt umfjöllun Morgunblaðsins eiga rúmlega sextíu þúsund íbúar landsins rétt á að nýta sér Loftbrú. Hver einstaklingur getur fengið niðurgreidd fargjöld á allt að sex flugleggi til og frá Reykjavík á ári.

Mikil aukning hefur verið á notkun Loftbrúar milli ára en samkvæmt Morgunblaðinu hafa fimmtíu prósent fleiri ferðir verið pantaðar í gegnum Loftbrú samanborið við árið 2021.

Samkvæmt tilkynningu Stjórnarráðsins frá því að verkefnið hófst er markmið verkefnisins að bæta aðgengi íbúa á landsbyggðinni að miðlægri þjónustu og efla byggðir með því að gera innanlandsflug að hagkvæmari samgöngukosti.

Vegagerðin hefur umsjón með Loftbrú og sinnir eftirliti og umsýslu tengdri henni.