Sigríður ráðin bæjarstjóri Fjallabyggðar

Sigríður var valin úr hópi fjórtán umsækjenda en átta umsækjendur höfðu dregið umsókn sína til baka, að því er segir í fréttatilkynningu frá bæjarstjórn Fjallabyggðar.

Sigríður er fyrrverandi forstjóri Nýsköpunarmiðstöðvar Íslands.Hún hefur setið á Alþingi fyrir Sjálfstæðisflokkinn og setið í bæjarstjórn á árum áður.

Hún er með MBA gráðu frá Háskóla Íslands og diploma í opinberri stjórnsýslu. Þá er hún með víðtæka reynslu af starfi með frumkvöðlum og fyrirtækjum, hefur setið í fjölmörgum stjórnum, nefndum, ráðum og starfshópum og sinnt margvíslegum trúnaðarstörfum fyrir hin ýmsu ráðuneyti.

Sigríður segist bæði stolt og þakklát fyrir það traust sem bæjarstjórn Fjallabyggðar hefur sýnt henni með þessari ráðningu. ,,Ég er full tilhlökkunar að flytja norður í þetta blómlega og fjölskylduvæna byggðarlag og takast á við þau spennandi verkefni sem framundan eru, í samstarfi við öfluga bæjarstjórn og starfsfólk Fjallabyggðar,“ er haft eftir henni í fréttatilkynningu.