Fyrst Bale og svo Chiellini til Los Angeles

Gareth Bale samdi við LAFC fyrr í vikunni og í gær var greint frá því að ítalski varnarmaðurinn Giorgio Chiellini hefði gert samning við félagið út tímabilið 2023.

Chiellini kemur til LAFC frá Juventus sem hann yfirgaf eftir síðasta tímabil. Hann lék með Juventus í í átján ár og varð níu sinnum ítalskur meistari með liðinu.

Varnarjaxlinn lagði landsliðsskóna á hilluna í apríl. Hann lék 117 landsleiki og varð Evrópumeistari með Ítalíu í fyrra.

Chiellini fylgdist með LAFC vinna 3-1 sigur á Dallas í MLS-deildinni í gær. Liðið er með sjö stiga forskot á toppi vesturdeildarinnar.