Krafðist að­gerða í til­finninga­þrunginni ein­ræðu

Rúmlega tvær vikur eru liðnar frá því að árásarmaður vopnaður hríðskotabyssu lék lausum hala í Robb-grunnskólanum í smábænum Uvalde í Texas með þeim afleiðingum að nítján nemendur og tveir kennarar létust.

Fyrir skotárásina hafði bærinn helst verið þekktur fyrir að vera heimabær leikarans McConaughey. Árásin er ein sú mannskæðasta sem framin hefur verið í skóla í Bandaríkjunum.

McConaughey ræddi stuttlega við Joe Biden Bandaríkjaforseta í gær áður en hann hélt 22 mínutna langa ræðu í blaðamannasal Hvíta hússins. Þar grátbað hann þingmenn Bandaríkjaþings um að samþykkja lög sem hefta aðgengi að kraftmiklum skotvopnum á borð við það sem notað var í skotárásinni í Uvalde.

„Við viljum örugga skóla og við viljum skotvopnalöggjöf sem gerir slæmum mönnum ekki svona auðvelt að nálgast þessar fjárans byssur,“ sagði McConaughey, sem var mikið niðri fyrir.

Þar húðskammaði hann þingheim fyrir aðgerðarleysi í skotvopnamálum. Þar hafa tilraunir til þess að herða skotvopnalöggjöf ekki náð fram að ganga, ekki síst vegna andstöðu þingmanna Repúblikanaflokksins. Þverpólitískur hópur þingmanna vinnur þó að því að ná einhvers konar samkomulagi um aðgerðir.

„Tækifærið er núna, við erum með opinn glugga sme hefur ekki verið opinn áður. Gluggi þar sem útlit er fyrir að alvöru breyting geti átt sér stað.“

Þá ræddi hann einnig um heimabæinn sinn Uvalde, þar sem hann sagðist hafa lært að bera virðingu fyrir skotvopnum. Hann hafi ferðast aftur til bæjarins daginn eftir árásina til þess að aðstoða þá sem ættu um sárt að binda.

Sagði hann sögur af fórnarlömbunum, meðal annars hinnar tíu ára gömlu Maite Rodriguez, sem hafi ætlað sér að verða sjávarlífræðingur. Camila McConaughey, eiginkona Matthew, sat álendar með græna Converse-skó. Maite hafði málað rautt hjarta á skóna.

„Þetta eru sömu grænu Converse-skórnir og hún var í, sem kom í ljós að var eina skýra sönnunargagnið sem hægt var að nota til að bera kennsl á lík hennar, sagði McConaughey með tárin í augunum. Svo virtust sem að tilfinningarnar væru að bera hann ofurliði þegar hann barði í borðið eftir að sagt frá Converse-skóm Maite.

Leikarinn hefur að undanförnu fundað með þingmönnum beggja flokka í Bandaríkjunum í von um að hægt verði að gríða til aðgerða.

McConaughey var orðaður við ríkisstjóraframboð í Texas í haust, en ákvað að bjóða sig ekki fram.

Sjá má ræðu leikarans í heild sinni hér að neðan.