Vilja ekki nýtt kalt stríð við Kínverja

Í ræðunni sagði Blinken að Bandaríkjamenn vilji ekki reyna að breyta hinu pólitíska kerfi í Kína. Bandaríkin muni þó vernda alþjóðalög og stofnanir sem tryggja eiga frið í heiminum og gera ríkjum kleift að lifa í samlyndi, það er að segja fjölþjóðakerfinu svokallaða.

„Jafnvel þó að stríð Pútíns haldi áfram, munum við áfram vera með alvarlegustu langtímaógnina gegn fjölþjóðakerfinu í brennidepli, og það er ógnin sem stafar af Kína,“ sagði Blinken í ræðunni samkvæmt AP fréttaveitunni.

Blinken sagði Kína eina ríki heims sem hefði bæði vilja til að breyta fjölþjóðakerfinu og getu og sagði getu Kína vera að aukast á öllum sviðum. Þá sagði hann að framtíðarsýn Kína myndi færa heiminn frá þeim gildum sem hafi haldið uppi framþróun heimsins síðustu 75 ár.

Bandaríkjamenn hafa á undanförnum árum tekið ákveðin skref til aukinnar stórríkjasamkeppni, ef svo má að orði komast.

Í varnarmálastefnu Bandaríkjanna sem birt var árið 2018 kom fram að minni áhersla yrði lögð á baráttuna gegn hryðjuverkastarfsemi og Bandaríkjamenn myndu leggja frekari áherslu á keppni stórra ríkja um áhrif á komandi árum. Að Bandaríkin þyrftu að sporna gegn Rússlandi og sérstaklega Kína.

Sjá einnig: Snúa sér að Kína og Rússlandi

Blinken sagði í ræðu sinni í gær að Bandaríkjamenn myndu leggja áherslu á uppbyggingu bandalaga til að hafa áhrif á Kína.

Til marks um það má benda á að Joe Biden, forseti Bandaríkjanna, er nýkominn heim úr ferð um Asíu þar sem hann sótti heim ráðamenn í Suður-Kóreu og Japan. Á því ferðalagi varði hann miklum tíma í að ræða um Kína og aukin umsvif Kínverja.

Biden lýsti því yfir í ferðinni að ef Kína reyni að gera innrás í Taívan muni Bandaríkjamenn standa við bakið á íbúum eyríkisins.

Sjá einnig: Segir ummælin ekki marka breytta stefnu gagnvart Taívan

Ósáttir við ræðuna

Ráðamenn í Kína hafa ekki tekið vel í ræðu Blinkens og saka Bandaríkin um að reyna að koma óorði á Kínverja. Wang Wenbin, talsmaður Utanríkisráðuneytis Kína, sagði í morgun að Blinken hefði dreift fölskum upplýsingum um Kína og utanríkisstefnu kommúnistaríkisins.

Hann sagði að markmið Blinkens væri að einangra og halda aftur af þróun Kína. Þá vildu Bandaríkin halda yfirráðum sínum.

„Varðandi þetta fjölþjóðakerfi sem Bandaríkin eru í málsvari fyrir, þá sjá allir sem eitthvað vita að það er ekkert annað en reglur samdar af Bandaríkjunum og nokkrum öðrum ríkjum til að halda uppi heimskerfi sem Bandaríkin stjórna,“ sagði Wang.

Hann sakaði Bandaríkin um fylgja eigin alþjóðareglum eftir með hentisemi.