„Ég get ekki að setið undir þeim orðum þingmannsins“

Andrés Ingi Jónsson þingmaður Pírata beindi fyrirspurn til Jóns Gunnarssonar dómsmálaráðherra.

„Ríkisstjórnin er í herferð gegn ákveðinni tegund flóttafólks,“ 

sagði Andrés og vísaði í útlendingafrumvarp sem verið hefur í deiglunni að undanförnu. „Sérstaklega beint gegn þeim sem fengið hafa vernd í öðru ríki.“

Andrés Ingi sagði ekkert öruggt við vernd í Grikklandi, það segðu allir sérfræðingar; þau væru útsett fyrir ofbeldi og væru á götunni, þau sem væru send aftur til Grikklands. Nú stæði til að senda um þrjú hundruð manns í þær aðstæður frá Íslandi. Íslandsmet í brottvísunum.

Jón sagði að Ísland væri aðili að alþjóðasamþykktum í þessum efnum og væri alls ekki að skera sig úr hvað það varðaði. Margir sem hingað hafi leitað hafi neitað að undirgangast PCR-próf og því hafi ekki verið hægt að framfylgja lögum og þannig hafi safnast upp hópur fólks sem hér dvelur með ólögmætum hætti sem nú væri verið að vísa af landi brott. Andrés Ingi sagði að auðvitað hafi þau neitað að fara í PCR-próf, það væri þeirra lagalegi réttur.

Hvernig geturðu réttlætt þetta fyrir sjálfum þér?

Sigmar Guðmundsson þingmaður Viðreisnar var næstur í pontu, hann hélt sig við það sama efni og Andrés Ingi en beindi fyrirspurn sinni til Guðmundar Inga Guðbrandssonar félags- og vinnumarkaðsráðherra. Sigmar tæpti á umræðu sem áður hafði farið fram á þingi og sagði til að mynda Katrínu Jakobsdóttur forsætisráðherra afsaka vonda stefnu í útlendingamálum með því að stefnan sé enn verri í öðrum löndum. 

„Þetta metnaðarleysi er dapurlegt og það er okkur ekki sæmandi.“ Sigmar taldi skort á pólitískum vilja ástæðuna fyrir því að ekki væri farið inn á manneskjulegri brautir; gagnvart börnum og fjölskyldum á flótta.

Sigmar nefndi að aðstæður í Grikklandi væru óboðlegar. Og við ættum að spyrja okkur væru einfaldlega þær hvort við myndum sjálf vilja láta senda okkur út á guð og gaddinn þar sem óöryggið er algjört: 

Hvers vegna erum við tilbúin að senda aðra í slíkar aðstæður, hvernig varaformaður Vinstri grænna gæti réttlætt það fyrir sjálfum sér?

Reglur hér ekki harðari en annars staðar

Guðmundi Inga var ekki skemmt við þessa spurningu þó hann samkvæmt etikettum þakkaði fyrir fyrirspurnina. Hann sagði umræðuna á þinginu í dag hafa gengið út á það að á Íslandi væri rekin ein harðasta útlendingastefna á Norðurlöndum og þó víðar væri leitað. Hann sagði að eftir að Katrín Jakobsdóttir tók við sem forsætisráðherra 2017 hafi Ísland tekið á móti fleira og fleira fólki svo muni hundruðum. 

„Samt þarf maður að sitja undir því að hér sé verið að gera minna heldur en aðrir – önnur lönd. Tölurnar tala sínu máli.“

Guðmundur Ingi sagði það ekki standast neina skoðun að hér væru harðari reglur en gilda til að mynda í Danmörku. Guðmundur Ingi sagðist hafa beitt sér sjálfur sem ráðherra í þessum málum, að taka á móti viðkvæmu fólki frá Afganistan og Úkraínu: 

„Og ég get ekki setið undir þessum orðum þingmannsins.“

Sigmar sagði í andsvari að það væri nú bara svo að Guðmundur Ingi þyrfti að sitja undir því sem sagt sé í ræðustól Alþingis. Hann sagði að ráðherrann hafi ekki svarað spurningunni.