Bein útsending: Framtíðin var í gær og tími aðgerða er núna

Fundurinn verður haldinn í Silfurbergi Hörpu, hefst klukkan 8:30 og stendur í tvær klukkustundir.

Þegar hafist var handa við uppbyggingu byggðalínu fyrir 50 árum glímdi íslenska þjóðin við vandamál sem nú eru aftur áberandi í umræðunni. Olíukreppa erlendis og orkuskortur innanlands gerðu atvinnulífi og heimilum erfitt fyrir á sama tíma verið var að fjárfesta í orkuskiptum.

„Til að orkuskipti geta orðið er ekki nóg að vinna raforku, heldur verður hún að skila sér með öruggum og hagkvæmum hætti til notenda. Öflugt flutningskerfi er grundvallarforsenda græns hagkerfis og það er kominn tími til aðgerða,“ segir í tilkynningu Landsnets vegna fundarins.

Framsögumenn verða þau Guðlaugur Þór Þórðarson, Umhverfis-, orku- og loftslagsráðherra, Guðmundur Ingi Ásmundsson, forstjóri Landsnets, Ari Trausti Guðmundsson, jarðeðlisfræðingur, Íris Baldursdóttir, Ráðgjafi stýrihóps um stefnumótun hjá ENTSO-E og Sigrún Jakobsdóttir, stjórnarformaður Landsnets.