Ungir inn­flytj­endur eiga erfitt með að fá vinnu

Rífa upp gólf, mála stóla og laga raf­leiðslur. Þetta er á meðal þess sem þátt­tak­endur nýs at­vinnu­leysis­verk­efnis fá að gera í Hreða­vatns­skála í Borgar­firði um þessar mundir.

Verk­efnið heitir Tæki­færið en að baki því stendur gamall pólitíkus sem nýtir nú menntun sína í fé­lags­ráð­gjöf til að hjálpa ungu fólki sem hefur verið at­vinnu­laust í langan tíma.

„Þetta er svona til­rauna­hópur. Við erum bara með sex þátt­tak­endur, svona í byrjun. Það duttu nú nokkrir úr skaftinu svona í upp­hafi. Það er svoldið erfitt að fá þennan hóp til virkni sem er búinn að vera lengi ó­virkur,“ segir Björk Vil­helms­dóttir fé­lags­ráð­gjafi.

Það er nefni­lega ekki svo auð­velt að fá vinnu á Ís­landi. Alla­vega ekki ef maður er er­lendur ríkis­borgari.

At­vinnu­leysi á landinu stendur í 5,2 prósentum í dag en af þeim tíu þúsund manna hópi eru 43 prósent er­lendir ríkis­borgarar - rúm­lega fjögur þúsund manns.

Ef maður hangir heima fær maður ekki vinnu

Al­fredo er einn þeirra sex sem eru í til­rauna­hópnum.

„Ég kom til Ís­lands til að þroskast því að í mínu landi er lífs­bar­áttan erfið. Ég er ó­menntaður og vildi fara til annars lands bara til að öðlast gott líf og kaupa marga hluti,“ segir Al­fredo Cor­reia, inn­flytjandi frá Portúgal.

Hann segir ekki auð­velt að fá vinnu á Ís­landi sem út­lendingur en þó snúist þetta oft um hugar­farið.

„Stundum er þetta erfitt... en ef maður hangir heima og gerir ekki neitt fær maður aldrei vinnu. Þess vegna erum við hér, til að sjá af hverju við finnum enga vinnu,“ segir Al­fredo.

Viss um að tilboðin komi

Björk er bjart­sýn á að hópurinn fái vinnu að verk­efninu loknu.

„Svo bara í maí þá er ég til­búin að taka við til­boðum frá at­vinnu­lífinu og ég veit að það verður sko nóg af til­boðum,“ segir Björk.