Gata eða torg í Reykjavík verði kennd við Úkraínu eða Kænugarð

Eyþór Arnalds, borgarfulltrúi Sjálfstæðisflokksins, lagði til að nafnanefnd yrði falið að breyta nafni Garðastrætis í Kænugarðsstræti, eða finna annan viðeigandi stað eftir atvikum.

„Tengsl Íslands og Kænugarðs ná yfir þúsund ár eins og lesa má um í fornum ritum. Enn þann dag í dag eru talsverð viðskipti og menningarleg tengsl milli Íslands og Úkraínu. Í dag er hart sótt að Úkraínu og höfuðborg hennar. Það er því við hæfi að minnast Kænugarðs að fornu og nýju með því að nefna götu í Reykjavík Kænugarðsstræti,“ sagði í tillögu frá fulltrúa Sjálfstæðisflokksins.

Málið var tekið fyrir á fundi skipulags- og samgönguráðs í fundi og svohljóðandi tillaga lögð fram:

„Nafnanefnd er falið að gera tillögu að götu eða torgi í Reykjavík sem kennd væru við Úkraínu eða Kænugarð.“