Sjáðu körfu­bolta­krafta­verkið í For­seta­höllinni í gærkvöldi

Álftnesingar voru fimm stigum undir í leiknum þegar aðeins þrjár sekúndur voru eftir af leiknum en tókst að framkalla sannkallað körfuboltakraftaverk í Forsetahöllinni.

Senurnar undir lok venjulegs leiktíma fara í sögubækurnar enda héldu allir að Haukar væru búnir að vinna leikinn þegar þeir komust í 78-73 rétt rúmum fjórum sekúndum fyrir leikslok.

Haukar brutu aftur á móti á Cedrick Taylor Bowen í þriggja stiga skoti þegar 1,5 sekúnda var eftir. Bowen hitti úr tveimur fyrstu skotum sínum en klikkaði á því þriðja. Álftnesingar náðu að slá sóknarfrákastið út til Eysteins Bjarna Ævarssonar sem setti í framhaldinu niður þriggja stiga skot, jafnaði leikinn og tryggði Álftanes framlengingu.

Bowen gat tryggt Álftanesi sigur í fyrstu framlengingunni en klikkaði þá á þriggja stiga skoti. Álftanes fékk lokaskotið í annarri framlengingu en klikkuðu aftur á þriggja stiga skoti.

Haukar unnu á endanum mikilvægan 108-107 sigur á Álftanesi í gærkvöldi í toppslag í 1. deild karla og eru þar með tveimur stigum á eftir toppliði Hattar auk þess að eiga tvo leiki inni á Austfirðinga.

Þetta var eitt síðasta tækifærið hjá Álftnesingum til að blanda sér í baráttuna um deildarmeistaratitilinn sem gefur beint sæti í Subway-deildinni en liðin í öðru til fimmta sæti keppa um hitt sæti í úrslitakeppninni í vor.

Það má sjá þennan ótrúlega lokakafla í venjulegum leiktíma hér fyrir ofan.