Fyrr­verandi varnar­mála­ráð­herra Dan­merkur grunaður um land­ráð

Þetta staðfestir hann í stuttri fréttatilkynningu sem flokkurinn Venstre birti í morgun. Verði Fredriksen fundinn sekur á yfir höfði sér allt að tólf ára fangelsi, en brotin falla í lögum undir kafla sem kallast „landráð“. DR segir frá málinu. 

Árið 2020 staðfesti Frederiksen í viðtali við Weekendavisen og fleiri fjölmiðla að leyniþjónusta danska hersins, FE, hafi unnið saman með bandarísku þjóðaröryggisstofnuninni, NSA, að njósnum í gegnum ljósleiðara.

Lars Findsen, fyrrverandi forstjóri FE, er nú í gæsluvarðhaldi vegna gruns um að hafa sömuleiðis lekið trúnaðarupplýsingum til fjölmiðla. Hann hefur verið í gæsluvarðhaldi síðan í desember.

Í yfirlýsingunni segir Frederiksen að hann hafi „sem þingmaður tjáð sig um pólitískt mál“ en að hann myndi aldrei nokkurn tímann geta skaðað Danmörku eða hagsmuni ríkisins.

Hinn 74 ára Claus Hjort Fredriksen var varnarmálaráðherra Danmerkur á árunum 2016 til 2019. Hann var sömuleiðis fjármálaráðherra á árunum 2009 til 2011 og aftur frá 2015 til 2016.