Um fimm hundruð manns sagt upp í hóp­upp­sögnum á síðasta ári

Frá þessu segir á vef Vinnumálastofnunar. Þá segir að alls hafi stofnuninni borist níu tilkynningar um hópuppsagnir á nýliðnu ári þar sem 497 manns var sagt upp störfum.

Síðasta hópuppsögn var í nóvember þar sem fjórtán starfsmönnum var sagt upp störfum í sérfræði- tækni- og vísindalegri starfsemi.

Með hópuppsögn er átt við uppsagnir atvinnurekanda á fastráðnum starfsmönnum þar sem fjöldi starfsmanna sem sagt er upp á þrjátíu daga tímabili er að minnsta kosti 10 starfsmenn í fyrirtækjum sem venjulega hafa 21-99 í vinnu, minnst 10% starfsmanna í fyrirtækjum með 100-299 í vinnu eða minnst 30 starfsmenn þar sem venjulega eru 300 eða fleiri.