Faldi milljónir á klósettinu í forsetahöllinni

Bruno Pacheco, fyrrverandi skrifstofustjóri Pedros Castillo forseta, er sakaður um að hafa þrýst á yfirmann skatta- og tollastofnunar landsins að veita fyrirtækjum í eigum vina hans vildarkjör. Því neitar Pacheco.

Þegar saksóknarar gerðu húsleit í forsetahöllinni á föstudag fundu þeir tuttugu þúsund dollara á salerni á skrifstofu Pacheco. Hann fullyrðir að hann hafi átt peningana sem hafi verið hluti af launum og sparnaði hans. Skrifstofustjórinn er sagður hafa um 6.250 dollara í mánaðarlaun.

Pacheco hafnar því alfarið að hann hafi sagt af sér vegna þess að hann hafi brotið af sér. Þess í stað hafi hann stigið til hliðar svo að forsetinn yrði ekki álitshnekk vegna þess sem Pachecho kallar „rógsherferð“, að því er kemur fram í frétt breska ríkisútvarpsins BBC.

Castillo tók við embætti forseta Perú í júlí en hann bar sigur af Keiko Fujimori, frambjóðanda hægrimanna og dóttur fyrrverandi einræðisherra landsins, í forsetakosningum. Sótt er að Castillo úr höllum áttum þessa dagana. Flokkur Fujimori ætlar að kæra forsetann til embættismissis og fyrrum félagar hans í kennarasambandi landsins hafa staðið fyrir kröfugöngum til að krefjast bættra kjara.