Tjón vegna staks leiks getur numið hundruðum þúsunda: „Ofboðslega vont fyrir hreyfinguna“

Samkvæmt gildandi samkomutakmörkunum stjórnvalda vegna Covid-19, sem gilda frá 13. nóvember til 8. desember, mega aðeins 50 áhorfendur vera í hverju rými á íþróttaleikjum.

Líkt og á öðrum menningarviðburðum er þó hægt að hafa 500 áhorfendur í rými með því að krefja þá um neikvæða niðurstöðu úr hraðprófi.

Flestir farið þá leið að loka húsunum

Hannes og Róbert Geir Gíslason, framkvæmdastjóri handknattleikssambands Íslands, segja ljóst að félögin muni ekki stunda það mikið að nýta hraðprófsmöguleikann. Það virðist of mikil fyrirhöfn fyrir venjulegan deildarleik í íþróttum. Því sé fyrirséð umtalsvert tjón fyrir félögin í landinu.

„Hljóðið í fólki er ekkert sérstakt. Þetta áhorfendabann hefur veruleg áhrif á rekstur félaganna því flestir hafa farið þá leið að loka bara húsunum fyrir áhorfendum,“ segir Róbert. Tjónið af áhorfendaleysi hvers leiks nemur frá tugum og upp í hundruð þúsunda:

„Þetta telur auðvitað mismikið hjá félögunum en þetta telur hjá þeim öllum. Það eru stórir leikir fram undan eins og Haukar-Valur í kvöld, og FH-Haukar í byrjun desember. Hvað FH-Haukar varðar þá nemur tjónið bara af þeim leik án efa hundruðum þúsunda. Tjónið er því verulegt en þetta ræðst af ástandinu í þjóðfélaginu, svona er bara staðan og við þurfum að bregðast við,“ segir Róbert.

Af hverju getum við ekki nýtt bólusetningarvottorð?

Hannes veltir upp möguleikanum á því að með notkun bólusetningarvottorða megi fleiri mæta á leiki. Svíar munu til að mynda nýta þennan möguleika frá og með 1. desember og geta fyllt sín íþróttahús.

„Miðað við hvað við erum orðin vel bólusett þá ætti að vera hægt að gera hlutina öðruvísi. Það er orðið mjög algengt úti í heimi í dag, þar sem fólk fær ekkert að mæta nema að það sé bólusett. Ég þekki þetta sjálfur úr ferðum mínum fyrir KKÍ. Af hverju getum við ekki tekið upp einhverjar svona reglur til að auðvelda fólki lífið?“ spyr Hannes og hvetur fólk til að drífa sig í bólusetningu eða fá örvunarskammt eigi það þess kost.

Hraðprófin verði sjaldan nýtt

„Auðvitað er hljóðið þungt í fólki með að það megi bara 50 áhorfendur mæta án þess að fara í hraðpróf. Hugsanlega er hægt að setja upp tvö 50 manna hólf en það er ekki mikið meira hægt að gera og auðvitað myndu forsvarsmenn félaganna vilja hafa meiri fjölda,“ segir Hannes sem tekur undir með Róberti með það að hraðprófin verði væntanlega sjaldan nýtt.

„Það eru fáir ef nokkrir sem munu fara út í það að nota hraðprófin. Fólk er kannski til í að nota hraðpróf þegar það hefur keypt dýra miða á tónleika eða í leikhús eða þess háttar, en það er ekki mikill vilji til að fara í hraðpróf til að komast á venjulegan deildarleik í íþróttum. Félögin þurfa að ákveða hvert fyrir sig hvað þau gera en það verður alla vega mjög sjaldgæft á meðan að reglurnar eru svona, að félög nýti hraðpróf til að geta tekið við 500 manns,“ segir Hannes og bendir á að sjálfboðaliðar í íþróttahreyfingunni, sem erfitt hafi verið að fá til starfa fyrir Covid, séu orðnir mjög þreyttir á ástandinu.

Þó má benda á að Njarðvíkingar hafa boðað það að hraðpróf verði nýtt vegna leikja liðsins í Subway-deildum karla og kvenna.

Í raun bara pláss fyrir 33 áhorfendur

„Mér sýnist flest félög hafa farið þá leið að leyfa ekki áhorfendur, alla vega hingað til,“ segir Róbert. „Þetta er töluverð fyrirhöfn. Vonandi verður ástandið í þjóðfélaginu betra og minni takmarkanir eftir þessa törn,“ segir Róbert sem bendir á að þó að 50 áhorfendur séu leyfðir í rými þá þýði það ekki einu sinni að 50 miðar séu seldir:

„Samkvæmt okkar útreikningum, þegar tekið er tillit til fjölmiðlamanna og sjónvarpsútsendingar, eru það bara 33 áhorfendur sem komast fyrir. Til að bæta við öðru 50 manna hólfi þarf sérinngang, sérklósett og sérinngang fyrir það hólf, og það er oft á tíðum illgerlegt í þessum húsum. Fólk hefur því frekar farið þá leið að loka húsunum og þeir 33 áhorfendur sem eru á leikjum eru stjórnarmenn og meistaraflokksráð, og mögulega leikmenn sem eru utan hóps eða stjórnarmenn gestaliðsins.“